Sport24.az
Misli Premyer Liqasının XI turunda doğma meydanda "Sumqayıt"la heç-heçə edən (0:0) "İmişli"nin müvəqqəti baş məşqçisi Ervins Perkons oyundan sonra keçirilən mətbuat konfransında jurnalistlərin suallarını cavablandırdı. Sport24.az xəbər verir ki, latviyalı mütəxəssis ilk növbədə Azərbaycan xalqını Zəfər Günü münasibətilə təbrik etdi, daha sonra qarşılaşman dəyərləndirdi:
– Bərabərsəviyyəli oyun keçdi. İlk hissə tam istədiyimiz, planlaşdırdığımız kimi alınmasa da, ikinci yarıda daha yaxşı çıxış etdik. Real qol epizodlarımız çox olmasa da, müəyyən imkanlar yarada bildik, xüsusilə son 15-20 dəqiqəni qeyd etmək istərdim. Düzdür, nəticə istədiyimiz kimi olmadı, amma ümumilikdə heç-heçənin ədalətli nəticə olduğunu və futbolçularımın nümayiş etdirdiyi oyundan razı qaldığımı deyə bilsəm də, xal itkisi sevindirici deyil.
– Bəxtiyar Həsənalızadə zədələnərək meydanı erkən tərk etdi. Zədənin durumu nə yerdədir? İlk dəfə start heyətdə şans qazanan Mehdi Tahirov və Faxardo Fernandesin çıxışını necə qiymətləndirirsiniz?
– Bəxtiyarın zədələnməsi bizim üçün böyük itkidir. Lakin onun yerinə meydana daxil olan Dieqo Rollo öyrəşmədiyi mövqedə oynamasına baxmayaraq, çox yaxşı iş gördü. Mehdi Tahirova ilk dəfə sağ cinah müdafiəçisi kimi şans verdik, aktiv idi, hücumlara qoşulurdu və duellərdən qalib ayrılırdı. Həmişə demişəm ki, ehtiyatda qalan oyunçular şans qazanacaqları an üçün hazır olmalıdırlar, çünki mövsüm uzundur və zədələr ola bilər. Faxardo da ilk dəfə əsas heyətdə idi. Yaxşı və pis məqamları oldu. Potensialının təxminən 60-65%-ni göstərdi, amma inkişaf üçün həmişə yer var. Onların startda yer alması həm də planımızın bir hissəsi idi ki, ikinci hissədə əvəzetmələrlə oyunu daha da gücləndirək.
– Rəhbərliyiniz altında komanda evdə uduzmur. Rəqiblərin bu stadionda qalib gələ bilməməsinin səbəbi nədir? Növbəti turda "Zirə" ilə matçdan gözləntiləriniz nədir?
– Uğurlu nəticələr şəxsən mənim yox, futbolçuların əməyidir. Həm məşqlərdə, həm də matçlarda onların yüksək motivasiyasını görmək olur. Qələbələrə görə onlara və uzaq yol qət edib bizi dəstəkləyən azarkeşlərimizə minnətdarıq. Digər tərəfdən, rəqiblərin süni ot örtüyünə vərdiş etməməsi və uzun yol gəlmələri də müəyyən rol oynaya bilər. Əsas məsələ yanaşmadır. Əgər bu enerjini və səyi növbəti oyunlarda da saxlasaq, indidən böyük bir layihənin təməlini qoymuş olacağıq.
– 4 oyuna 7 xal toplamısınız. Qarşıda milli komandaların oyunları ilə bağlı fasilə gəlir. Baş məşqçi postuna rəsmi təyinatınız ehtimalı barədə nə düşünürsünüz?
– Yaxşı nəticə 4 oyuna 12 xal toplamaq olardı, bizim məqsədimiz də həmişə budur. Futbolçuların performansından razı olsam da, xal itkiləri ilə barışmıram. Rəsmi baş məşqçi təyinatıma gəlincə, bu sual daha çox klub rəhbərliyinə və prezidentə ünvanlanmalıdır. Mən Azərbaycanda olduğum ilk gündən komandanın uğuru üçün əlimdən gələnin ən yaxşısını etməyə çalışıram.
