Sport24.az
"Birinci Liqadan futbolçu dəvət edilməsi, müsbət haldır. Açığı, həmin liqanı çox izləmirik amma futbolçunun Premyer Liqa təcrübəsi də var. Adın fərqi yoxdur, əsas odur milliyə dəvət alan futbolçu göstərsin ki, Birinci Liqada oynamaq dünyanın sonu deyil. Bunu "Sabah" və "Şamaxı"nın futbolçuları sübut edib". Bu sözləri Sport24.az-a açıqlamasında Erkin İbrahimov deyib.
Tanınmış futbol agenti millinin baş məşqçisi Fernandu Santuşdan gözləntilərin böyük olduğunu bildirib:
"Yığma komanda olaraq qələbə qazanmağa acıq. Fernandu Santuş böyük ümidlərlə gətirilib. Legioner məşqçidən gözləntilər həmişəm böyük olub. Baş məşqçi postunda Şahin Diniyev olsaydı, bəlkə də bu qədər gözləntilər olmayacaqdı. Hər nə qədər desək də yoldaşlıq görüşündə nəticə önəm daşımır, bizim üçün hər xırda nəticədə önəmlidir. Millinin düzgün yolda olduğunu görmək çox vacibdir. Bu yoldaşlıq görüşləri təməl qoymağa kömək olacaq. Realistik, heç kim yığmanın hansısa böyük turnirin final mərhələsində çıxış etməsini gözləmir. Bəlkə 100 komanda çıxış etsə bizim də şansımız olar. Yoldaşlıq görüşündə üz-üzə gələcəyimiz hər iki rəqibimiz bizimlə eyni səviyyədədir".
Qeyd edək ki, Azərbaycan millisi martın 22-də Haiti, 25-də isə Belarusla yoldaşlıq oyunları keçirəcək.
