Idman.biz
"Öncə klub rəhbərliyinə göstərilən etimada görə minnətdarlığımı bildirmək istərdim. Gəncə mənim üçün doğma şəhərdir. Futbol ilə nəfəs alanlar üçün Gəncə dedikdə əvvəlcə "Kəpəz" yada düşür".
İdman.biz xəbər verir ki, bu fikirləri "Kəpəz"in İdarə Heyətinin yeni sədrinin idman məsələləri üzrə müşaviri Erkin İbrahimov deyib.
Tanınmış futbol meneceri təyinatı ilə bağlı özünün sosial şəbəkə hesabındakı paylaşımında qeyd edib ki, ölkəmizin ən tarixi, ən titullu klublarından birində çalışmaq qürurvericidir və məsuliyyətlidir: "İnanıram ki, birlikdə tapşırılan missiyanın öhdəsində gələcəyik. Birlikdə dedikdə şəhər futbol ictimaiyyətini, o cümlədən çoxminli azarkeş ordusunu, "Kəpəz"ın uğurları üçün tər tökmüş veteranları da nəzərdə tuturam.
Kluba rəsmi təyinatımız "Kəpəz"in Premyer-Liqada qalması ilə eyni günə təsadüf etdi. Məlum səbəblərdən son illər "Kəpəz" yüksək liqada qalmaq uğrunda mübarizə aparırdı. Şadam ki, klubda çalışanların, məşqçilər korpusu və oyunçuların əməyi hesabına "Kəpəz" növbəti mövsümdə də ölkəmizin ikinci şəhərini Premyer-Liqada təmsil edəcək.
Futbol komanda oyunudur. Yeni idarəçilik komandasında təmsil olunanların hamısı Gəncəyə bağlı, futbolu sevən insanlardır. Əsas məqsədimiz "Kəpəz"i tədricən əvvəlki mövqələrə qaytarmaqdır. Təbii ki, bu, zaman tələb edir. Ümid edirəm ki, "Kəpəz" ailəsi vahid məqsəd uğrunda birləşərək, bu missiyada bizə dəstək verəcək".
İdman.biz
