Sport24.az
"Çelsi" və Argentina millisinin yarımmüdafiəçisi Enso Fernandes yığmasının DÇ-2026 perspektivindən və "La Albiceleste"nin kapitanı olmaq istəyi barədə danışıb. Sport24.az xəbər verir ki, o, bu barədə "TyC Sports"a açıqlama verib:
"Əlbəttə ki, bunu arzulayıram. Kapitan sarğısını taxmaq mənim üçün şərəf olardı, amma bu, məndən asılı deyil. Bu, məşqçilər heyətinin qərarıdır. Bunun nə vaxt baş verəcəyini bilmirəm. Zaman göstərəcək. Bizi nəyin gözlədiyinə diqqət yetiririk. Bilirik ki, bu, Messinin son dünya çempionatı ola bilər, ona görə də titulunu qorumaq üçün əlimizdən gələni edəcəyik. Komandamız bunu etməlidir. Argentinalılar çox ehtiraslıdırlar və həmişə daha çox şey istəyirlər".
Qeyd edək ki, DÇ-2026 gələn yay üç ölkədə - ABŞ, Kanada və Meksikada keçiriləcək. Argentina son çempiondur. Cənubi Amerika təmsilçisi 2022-ci il dünya çempionatının finalında Fransa ilə qarşılaşıb. Oyunun əsas vaxtı 3:3 hesabı ilə başa çatsa da, penaltilər seriyasında argentinalılar daha güclü oldular (4:2).
