Idman.biz
Misli Premyer Liqasında sonuncu medalın sahibi "Araz-Naxçıvan" olub.
İdman.biz xəbər verir ki, Elmar Baxşıyevin yetirmələrinin 3-cü yeri XXXV turda qazanması ilə bürüncün əldən-ələ gəzmə tendensiyası davam edir.
Artıq 9 mövsümdür ki, 3-cü yerin sahibi hər dəfə dəyişir. Bir il əvvəl bürüncə sahib olan "Sabah"ın "üçlük"dəki yerini itirməsi "Araz-Naxçıvan"ın yolunu açıb.
Ardıcıl bürünc medallar qazanan sonuncu komanda "Qəbələ" olub. Bölgə təmsilçisi 2013/14, 2014/15 və 2015/16 mövsümlərində ardıcıl 3 dəfə 3-cü yeri tutub.
"Qırmızı-qaralar" bürünc seriyasına 2016/17 mövsümündə gümüşə qədər yüksəlməklə son qoyub. Amma bürünc sahiblərinin heç də hamısının taleyi eyni olmayıb.
Düzdür, "Qəbələ" 2015/16, "Neftçi" 2017/18 mövsümündəki bürüncü gümüşə çevirib. Amma "İnter"2016/17, "Səbail" 2018/19, "Keşlə" 2019/20, "Sumqayıt" 2020/21, "Zirə" 2021/22, "Neftçi" 2022/23, "Sabah" 2023/24 mövsümündə qazandığı üçüncülükdən sonra mükafatsız qalıb. Son altı ildə də belə tendensiya yaşanıb.
Qeyd edək ki, ümumilikdə 16 fərqli komanda bürünc mükafata sahib çıxıb. "Neftçi" daha çox – 7 dəfə bunu bacarıb. "İnter" və "Keşlə" adları ilə çıxış etmiş "Şamaxı"nın 4, "Qarabağ"la "Qəbələ"nin 3 belə mükafatı var.
Vüqar Xeyrullayev
İdman.biz
