Sport24.az
"Oyuna ciddi hazırlaşmışdıq. "Araz-Naxçıvan" mövsümə uğursuz start vermişdi və bu üzdən II turda daha istəkli, aqressiv olacağını bilirdik". Bu sözləri Sport24.az-a açıqlamasında "Şamaxı"nın futbolçusu Emin Zamanov deyib.
26 yaşlı futbolçu II turda məğlub olduqları "Araz-Naxçıvan" oyunu şərh edib: "Mərdəkana xal götürmək üçün gəlmişdik. Fikrimcə, pis oynamadıq. Kəsərli hücumlar təşkil edib qol axtarışında olsaq da, əlimizə düşən fürsətlərdən yararlana bilmədik. Rəqib qapıçının yaxşı oyununu da qeyd etmək lazımdı. Belə olduqda "vurmayana, vurarlar" deyimi işə düşdü. Rəqib bir qol vurub hesabı qorumaq üçün yaxşı qapandı. Çempionatda ikinci oyunumuzu keçirdik, amma bizi qarşıda uzun marafon gözləyir. Səhvlərimizdən dərs çıxarıb qarşıdakı turlarda daha yaxşı çıxış etməyə çalışacağıq".
"Şirlər"in yarımmüdafiəçisi komandanın baş məşqçisi Ayxan Abbasovun iş metodundan da danışıb: " İlk dəfədi Ayxan müəllimin rəhbərliyi altında oynayıram. O, təcrübəli, nəticə verməyi sevən, futbolçuların inkişafında maraqlı olan mütəxəssisdi. İnanıram ki, Ayxan Abbasov sayəsində mənim də karyeram yüksəl qrafik üzər inkişaf edəcək".
ABDULLA İSMAYILOĞLU
