Idman.biz
"Matça yaxşı başladıq. Rəqibi əks-hücumlarda uğurla qarşıladıq və hesabı da ilk olaraq biz açdıq."
İdman.Biz xəbər verir ki, bunu Azərbaycan milli komandasının kapitanı Emin Mahmudov deyib.
Təcrübəli yarımmüdafiəçi DÇ-2026-nın seçmə mərhələsində Fransaya 1:3 hesabı ilə uduzduqları matçla bağlı fikirlərini bölüşüb:
"Hesabı açdıqdan sonra ikinci qolu vurmağa çalışdıq, amma alınmadı. Rəqib isə öz səviyyəsini və keyfiyyətini göstərdi. Bizə əks-hücum qurmağa imkan vermədilər. Təzyiqi artırdıqdan sonra qollar vurdular. İlk hissədə ard-arda qollar buraxdıq. Bunu gücümüzün çatmaması ilə əlaqələndirə bilmərəm, sadəcə rəqibin keyfiyyəti çox yüksəkdir. Fiziki cəhətdən də güclü komandadırlar, buna görə bizim üçün bir az çətin oldu".
Mahmudovun sözlərinə görə, komandadakı futbolçular bir-birinə inanaraq oynayırlar:
"Hamımız bir-birimizə kömək etməyə çalışırıq. Bəzən alınmır, amma irəliləyiş var. Müdafiədə daha yaxşı oynayırıq. Düzdür, uduzuruq, və yeganə problem də budur"
Oyunçu bəzi komanda yoldaşlarının klublarında az forma şansı əldə etməsinə də toxunub:
"Əslində bu, böyük problemdir. Onsuz da çox oyunçumuz yoxdur və futbolçuların klublarında daha çox oynamağını istəyirik. Klublarında az meydana çıxdıqları üçün ikinci hissədə yorğunluq hiss olunur. Heyətdə gənc futbolçular da var. Onlar mütəmadi oynasalar, gələcəkdə bizə böyük kömək edəcəklər".
Emin Mahmudov son matçlarda əvəzlənməsinin zədə ilə bağlı olduğunu bildirib: "90 dəqiqə oynamağa risk etmədim, çünki yenidən zədələnə bilərdim. Son vaxtlar az məşq etmişəm. Bir az gözləsəm, zədəm tam keçəcək. Özümə daha yaxşı diqqət etməliyəm ki, zədə yaranmasın".
