Report.az
Futbol üzrə Azərbaycan millisinin bombardiri olan Emin Mahmudov yığmadakı ilk qoluna 2018-ci ildə imza atıb.
"Report"un araşdırmasına görə, hazırda 33 yaşı olan yarımmüdafiəçi həmin vaxt komandanın Riqada Latviyaya qalib gəldiyi (3:1) yoldaşlıq matçında fərqlənib.
Mahmudov millidəki qollarının əksəriyyətini isə 2021-ci ildə vurub. O, həmin vaxt dünya çempionatının seçmə mərhələsində 4 dəfə rəqib qapılarına yol tapıb. Təcrübəli oyunçu Bakıda və Belqradda Serbiyaya uduzduqları (1:2, 1:3) hər iki görüşdə fərqlənməyə müvəffəq olub. Yarımmüdafiəçi səfərdə Lüksemburqa yenildikləri (1:2) dueldə və Dublində İrlandiya ilə bərabərə (1:1) qaldıqları matçda da adını tabloya yazdırıb.
Bundan əlavə, Mahmudov 2021-ci ildə baş tutan yoxlama oyunlarında da qol vurub. Yığmanın hazırkı kapitanı Alanyada Türkiyəyə uduzduqları (1:2) qarşılaşmada fərqlənibsə, Bakıda Qətərlə heç-heçə etdikləri (2:2) görüşdə dulba imza atıb.
Emin Mahmudov 2022-ci ildə isə millidə bir qolla yadda qalıb. O, Kişineuda Moldovaya qalib gəldikləri (2:1) yoldaşlıq matçında adını tabloya yazdırıb.
Futbolçu 2023-cü ildə yığmada 4 dəfə rəqiblərin qapısına yol tapıb. Orta xətt oyunçusu Linzdə Avstriyaya məğlub olduqları (1:4) Avropa çempionatının seçmə mərhələ qarşılaşmasında, Bakıda İordaniyanı üstələdikləri (2:1) yoldaşlıq matçında adını tabloya yazdırıb. E.Mahmudov doğma meydanda İsveçi 3 cavabsız qolla yendikləri seçmə mərhələ görüşündə isə dubl müəllifi olub.
Yarımmüdafiəçi Azərbaycan komandasının sonuncu dəfə qalib gəldiyi görüşü də boş keçməyib. O, 2024-cü ildə Macarıstanın Sombatxey şəhərində Qazaxıstandan üstün olduqları (3:2) yoxlama görüşündə də fərqlənərək yığmada 14-cü qolunu vurub və bu göstəricidə Azərbaycan millisinin keçmiş hücumçusu Qurban Qurbanova çatıb.
Nəhayət, kapitan ötən gün Bakıda Ukrayna ilə bərabərə qaldıqları (1:1) DÇ-2026-nın seçmə mərhələsinin oyununda penaltidən fərqlənərək tarixə düşüb və komandanın bombardiri olub.
Azərbaycan millisinin bombardirləri
1. Emin Mahmudov – 15 qol
2. Qurban Qurbanov – 14
3. Ramil Şeydayev – 10
4. Vaqif Cavadov – 9
5. Dmitri Nazarov - 8
6-8. Rauf Əliyev - 7
Branimir Subaşiç - 7
Elvin Məmmədov - 7
9-10. Zaur Tağızadə - 6
Mahir Emreli – 6
emin mahmudov Bombardir Azərbaycan millisi rekord Futbol
