Idman.biz
Azərbaycan millisinin futbolçusu Emil Mustafayevin yeni mövsümə hansı komandada başlayacağı hələ ki bəlli deyil. Lakin onun yeni mövsümdə "Polessye"də qalmayacağı dəqiqləşib.
Məxsus olduğu klubun düşərgəsində yer almayan Mustafayev özünə yeni komanda axtarır.
İdman.biz xəbər verir ki, Apasport.az-a açıqlama verən 23 yaşlı futbolçu yeni mövsümlə bağlı fikirlərini bölüşüb.
O, mövsümün toplanışına "Polessye"də başladığını deyib: "Lakin sonradan rəhbərlik mənə bildirdi ki, özümə yeni klub tapmalıyam. Hazırda bir neçə komandadan təklif almışam və danışıqlar davam edir. Bütün təklifləri nəzərdən keçirirəm, amma hələlik konkret qərar yoxdur. Gözləmə mövqeyindəyəm, necə olacağını görəcəyik".
Qeyd edək ki, milli komandamızın yarımmüdafiəçinin "Polessye" ilə müqavilə müddəti 2027-ci il iyunun 30-na qədərdir. O, 2024/2025 mövsümündə qış fasiləsindən sonra "Çernomorets"də icarə əsasında çıxış etmişdi.
İdman.biz
