Sport24.az
PFL prezidenti Elxan Səmədovun Sport24.az-a müsahibəsi.
- "Qarabağ"ın "Nyukasl"la oyunları barədə fikirlərinizi bilmək istərdik...
- Dünyanın ən güclü liqasının təmsilçisi ilə oyunda nəinki "Qarabağ"ın, bütün klubların çətinliklər yaşaması normal haldır. Qurban bəyin də dediyi kimi ilk oyundakı zərbədən komanda yaxşı dərs çıxarmışdı. İlk iki qolun ötən oyundakından da tez vurulması belə çaşqınlıq yaratmadı ki, bunun özü alqışalayiq haldır. Komandamız sonadək vuruşdu. Reaksiyalardan da görünür ki, "Qarabağ" tək bizim deyil, dünyanın hər nöqtəsindən futbol həvəskarlarının rəğbətini qazandı. "Qarabağ"ın simasında hər bir futbol adamımız böyük təcrübə əldə etdi.
- Ağdamlıların cari avrokubok mövsümündə çıxışını necə qiymətləndirirsiniz?
- "Qarabağ" bizi avrokuboklarda qrup mərhələlərinə öyrəşdirib. Bu uğurun arxasında böyük əziyyət dayanır. Klubun prezidenti Tahir Gözəl başda olmaqla, baş direktor Əmrah Çəlikəl, İdarə Heyətinin üzvü Asif Əsgərov, baş məşqçi Qurban Qurbanov, ümumiyyətlə, komandanın hər bir üzvünə təbriklərimi və dərin təşəkkürümü çatdırıram. "Qarabağ" möhtəşəm nəticəyə imza atdı. Avropanın ən güclü 24 komandası arasında olmaq müzakirəsiz böyük uğurdur. Və ən əsası bu uğur zamanı tək "Qarabağ"ın deyil, ümumilikdə Azərbaycanın adı çəkilir ki, bununla da bu ölkəni sevən hər bir insan fəxr duyur, qürur hissi keçirir.
- Səmimi olmağınızı istəyirəm. Mövsümün əvvəlində siz belə nəticə gözləyirdiniz?
- Düzü püşkdən sonra ümidlərim böyük deyildi. Çünki komandalara baxdığınız zaman işin ağırlığı göz önünə gəlirdi. Amma "Qarabağ"ın ilk qələbəsindən sonra inandım. Hiss olunurdu ki, komandanın özü də rəqiblərə baxış fərqi qazandı. Çempionlar Liqasının məsuliyyəti qalsa da, ağırlıq üzərlərindən atılmışdı. Klubdakı hər kəs sanki hədəfin mümkünsüz olmadığını real qəbul etdi.
- Qarşıdakı illərdə Azərbaycan klubları bu nəticəni göstərə bilərmi?
- Bizə yalnız ümid etmək qalır. Hər zaman klublarımıza inanmışam. Bu gün "Qarabağ"la başabaş oynayan, hazırda xal fərqində ondan öndə olan "Sabah" nümunəsi var. Ardıcıl avrokuboklara vəsiqə qazanan "Zirə", dirçələn "Turan Tovuz", "Neftçi"ni görürük. "Araz Naxçıvan", "Sumqayıt" beynəlxalq turnirləri yaxınlarda "dadıblar". Yəni təbii ki, "Qarabağ"ın bugünkü nəticəsini qəfil əldə etmək çox çətindir. Buna zaman və səbr lazımdır. Amma ən azı klublarımız üçün hər mövsüm qarşılaşdıqları və gözlərinin önündə olan bir klub nümunəsi var. Hər biri üçün mümkün olduğuna böyük inamım var.
- Neçə ildir avrokubokların əsas mərhələlərində yalnız bir klubla təmsil olunuruq. Növbəti mövsüm bu sayı artıra biləcəyik?
- Gələn mövsüm bu sayın ən azı 2 olacağına çox inanıram. Komandalarımızın əvvəllər qrup mərhələlərində oynaması, pley-offdan qayıtması bu yolun yenidən gedilməsinin mümkünlüyünü göstərir. Yəni təcrübəmiz var. Sadəcə bir az da diqqətli olub sona çatdırmaq lazımdır
