Sport24.az
"Millidən qələbə gözləyirik. Rəqiblərimiz elə də güclü deyillər. Düzdür, yoldaşlıq oyunları böyük önəm daşımır, amma millimiz çoxdandır qələbə qazanmır. Yaxşı olardı ki, qalib gələrdilər". Bu sözləri Sport24.az-a açıqlamasında Elxan Abdullayev deyib.
Azərbaycan millisinin sabiq məşqçisi yığmanın uğur qazanması üçün baş məşqçi Fernando Santuşa vaxt lazım olduğunu bildirib:
"Bir qədər vaxt lazımdır. Mənə də çox maraqlıdır ki, futbolçular özlərini necə göstərəcək? Yığmanın oyunçuları öz klublarında oynayacaqlar yoxsa yox? Suallar çoxdu, gözləmək lazımdır. Fernando Santuş uğurları olan məşqçidir. Bir ilin içində ondan nəsə gözləmək düz çıxmaz. Ona da vaxt lazımdır. Bu mərhələdən sonra hər şey bilinəcək".
Qeyd edək ki, Fernandu Santuşun rəhbərlik etdiyi milli martın 22-də Sumqayıtda Haiti, 25-də isə Masazırda Belarus yığması ilə qarşılaşacaq.
