Sport24.az
Ötən mövsümün ilk yarısını "İrəvan"nın, qışdan sonra isə "İmişli"nin formasını geyinən Elvin Yunuszadə bu günlərdə "Qəbələ" ilə anlaşdı. Sport24.az-a müsahibə verən təcrübəli müdafiəçi həm yeni klubuna keçidindən danışıb, həm də bizi maraqlandıran başqa sualları cavablandırıb.
- Axır ki, klubsuz dönəmin başa çatdı. "Qəbələ"yə keçidinlə bağlı fikirlərin maraqlıdı...
- "Qəbələ" ölkə futbolunda özünə görə ağırlığı olan, iki dəfə avrokubokların qrupunda oynamış klubdu. Təklif gəldi, götür-qoy etdikdən sonra "qırmızı-qaralar"la müqavilə bağlamağa qərar verdim. Komandanın qarşısına elitaya qayıtmaq məqsədi qoyulub. Mən də "Qəbələ"nin yenidən Premyer Liqaya dönməsi üçün əlimdən gələnin ən yaxşısını edəcəm.
- Başqa təklifləri yox idi?
- İki xarici klubla danışıqlar gedirdi. Sadəcə, iş uzandığından "Qəbələ"dən gələn təklifi dəyərləndirdim.
- "Qəbələ"də Asif Məmmədov və Səlahət Ağayev kimi təcrübəli futbolçular yer alır. Sənin də komandaya qoşulmağınla say artdı. Səncə, bu "trio" bölgə klubuna nə verəcək?
- Həm Asif, həm də Səlahət ölkə futbolunda iz qoymuş, yığmada da oynamış təcrübəli futbolçulardı. Bu gün onların komanda da olması "Qəbələ" üçün faydalı, gənclər üçün stimuldu. Hər bir halda, istənilən kollektivdə təcrübəli futbolçular olmalıdı
- I Liqada "İmişli", MOİK, "Qaradağ Lökbatan, "Karvan" kimi iddialı klublar var. Çempionluq uğrunda mübarizə çətin olmayacaq?
- Həmişə demişəm, bir də təkrarlayıram. Elita ilə müqayisədə I Liqada oynamaq daha çətindi. Əvvəla ona görə ki, çempionluğa bir neçə komanda iddialıdı. Uzağa getmətib, ötən mövsümə nəzər yetirək. 5 komanda çempion olmağa çalışırdı. III dövrənin ortalarına qədər gərginlik, mübarizə davam etdi. "Şamaxı" isə sonuncu turda "qızıl"a sahib çıxdı. Digər çətinlik isə infrastuktur, meydanlarla bağlıdı. Düzdü, "Qəbələ"də şəraitlərlə bağlı problem olmasa da, digər komandaların stadionlarının ot örtüyünün vəziyyəti ürəkaçan deyil. Bu da zədə riskini artırır. Çempionluq uğrunda mübarizədə tək olmamağımız bizə motivasiya verir.
- Sabiq komandan "Neftçi" III tur geridə qalmasına baxmayaraq, hələ də qələbə qazana bilməyib. Bu barədə nə deyərdin?
- "Neftçi"inin yetirməsiyəm.Burda uşaq futbolundan başlayaraq əsas komandaya yüksəlmişəm. "Ağ-qaralar"ın ötən mövsümkü çıxışı ürəkaçan olmadı. Komanda qarşısına qoyulan məqsədlərə nail ola bilmədi və avrokuboklardan da kənarda qaldı. Cari mövsümə də yaxşı başlamayıb. Amma düşünürəm ki, indidən "Neftçi"nin üzərinə çox getmət düz deyil. Həm mövsümün əvvəlidi, həm komandaya yeni baş məşqçi gəlib, həm də kollektiv bir-birinə tam uyğunlaşmayıb. "Ağ-qaralar"ın zamana ehtiyacı var. Roman Qriqorçuk Azərbaycan futbolunda uğur qazanmış tək-tük əcnəbi məşqçilərdəndi. O, futbol mentalitetimizi yaxşı bilir. Ukraynalı mütəxəssis hələki istədiyi oyun fəlsəfəsini futbolçulara aşılaya bilməyib. Ona vaxt vermək lazımdı.
ABDULLA İSMAYILOĞLU
