Sport24.az
I Liqanın lideri "Qəbələ" qış fasiləsinə qapısında qol görmədən yollanıb. Müdafiə xəttin inamlı oyunu komandanın ilk pillədə qərarlaşmasına da təsirini göstərib. "Qırmızı-qaralar"ın təcrübəli müdafiəçisi Elvin Yunuszadə Sport24.az-a müsahibə verib. Onunla söhbətdə həm bu məsələyə toxunduq, həm də bizi maraqlandıran başqa suallara cavab tapmağa çalışdıq.
- Mövsümün ikinci yarısına hazırlıq necə gedir?
- Hazırlığımız normal, qaydasında gedir. Hər şey plana uyğun şəkildə dava edir. Hazırda yüklənmələr daha çoxdur.
- Yoxlama oyununda "Mingəçevir"i 4:0 hesabı məğlub etdiniz. Bu matç haqqında nə deyə bilərsən?
- Hər qarşılaşmada qalib gəlmək komanda üçün yaxşı motivasiyadır. Bunun yoxlama və rəsmi görüş olmasının fərqi yoxdur. Bundan əlavə, bu cür oyunlarda səhvlərimizi görürük və bunların üzərində işləməliyik.
- Komanda 29 xalla liderdir. Ən yaxın izləyiciniz isə "Karvan"ın 25 xalı var. Səncə, Premyer Liqa uğrunda mübarizə son turlaradək davam edəcək?
- Birinci pilləyə qalxmaq üçün 3-4 ay gözləməli olduq. Bu asan olmadı. Özümüz də dərk edirik ki, liderliyə yüksəlməkdən daha çətin orada möhkəmlənməkdir. Mövsümü birinci sırada başa vurmaq üçün əlimizdən gələnin ən yaxşısını etməyə çalışırıq.
- Karyeranda ilk dəfə I Liqada mübarizə aparırsan. Daha əvvəl legioner həyatı da yaşamısan. Bu çempionatda səni təəccübləndirən nələr oldu?
- Məncə, I Liqada oynamaq yüksək dəstədə mübarizə aparmaqdan daha çətindir. Burada tamam başqa futbol, oyun sistemi gedir. Hər şey fərqlidir. Bunu sözlərlə ifadə etmək də çətindir.
- "Qəbələ" 11 oyunda qapısını toxunulmaz saxlayıb. Bunun nə vaxtadək davam edəcəyini düşünürsən?
- Bu sevindirici haldır. Amma hər şeydən əvvəl matçlardakı məqsədimiz qələbə qazanmaqdır. Qarşılaşmalarda qol buraxmamaq daha da xoşdur. Bacardığımız qədər qapımızı toxunulmaz saxlamağa çalışacağıq.
- I Liqada ilin ilk oyununda "Baku Sportinq"lə üz-üzə gələcəksiniz. Bu matç haqqında fikirlərin nədir?
- Bu komanda ilə iki dəfə üz-üzə gəlmişik. Pis komanda deyil. Yaxşı və istəkli kollektivdir. Hər şeydən əvvəl uzun fasilədən sonra çempionatın ilk qarşılaşması hamı üçün çətin keçir. Biz də bunu bilirik. Hazırlaşırıq, mövsümün ikinci yarısına uğurlu start vermək niyyətindəyik.
- "Qəbələ" ilə müqavilən mövsümün sonunda başa çatır. Bu yöndə klubla danışıqlara başlamısanmı?
- Xeyr. Hələlik müqavilə ilə bağlı danışmamışıq. İlk olaraq qarşımıza qoyulan hədəfə çatmalıyıq. Çempion olduqdan sonra bu barədə söhbət edə biləcəyik.
