Sport24.az
"Bugünkü oyun yetəri qədər ağır və çətin olacaq". Bu sözləri Sport24.az-a "Qarabağ"ın sabiq futbolçusu Elvin Yunuszadə deyib.
"Karvan-Yevlax"da çıxış edən müdafiəçi Azərbaycan təmsilçisinin UEFA Çempionlar Liqasında bu gün "Çelsi"yə qarşı keçirəcəyi matçla bağlı danışıb.
"Çelsi" dünyanın top komandalarından biri olub. Həmişə heyətində ulduz oyunçular yer alıb. Bizi maraqlı qarşılaşma gözləyir. "Qarabağ"ın işi həqiqətən çətin olacaq. Amma düşünürəm ki, artıq təmsilçimiz öz oyunu ilə sübut edir ki, hər bir top komandadan xal və ya xallar qazana bilər".
Yunuszadə 2017-ci ildə "köhlən atlar"ın heyətində London klubuna qarşı oynadığını görüşü də xatırlayıb:
"Bu rəqiblə 2017-ci ildəki matç dünənki gün kimi yadımdadır. Tamam başqa bir səviyyə idi. Meydanda fərqli tepm var idi. Hamımızı, hər bir futbolsevəri bu gün daha bir maraqlı görüş gözləyir. "Qarabağ"a uğurlar arzulayıram. Ümid edirəm ki, komanda yenə bizi sevindirəcək. Həyəcanla bu matçı gözləyirik".
Qeyd edək ki, bu gün Respublika stadionunda keçiriləcək "Qarabağ" - "Çelsi" oyunu saat 21:45-də start götürəcək.
