Sport24.az
"Qəbələ"nin futbolçusu Elvin Yunuszadənin Sport24.az-a müsahibəsi
- I Liqanın 22-ci turunda səfərdə "İmişli" ilə üz-üzə gələcəksiniz. Oyunla bağlı nə deyə bilərsən?
- Bu səfər hər bir komanda üçün çətindir. Bizim üçün də elə olacaq. Bunu bilirik. Məhz buna uyğun da hazırlaşmışıq. Rəqib çempionatda favorit, ən yaxşı komandalardan biridir. Güclü heyətə malikdirlər. Bilirəm ki, azarkeşlərimizi çox maraqlı qarşılaşma gözləyirik.
- Qələbə qazansanız, digər nəticələrdən aslı olmayaraq çempionluğu rəsmiləşdirəcəksiniz. Buna köklənmisinizmi?
- Əlbəttə. İstədiyimiz nəticəni əldə edib çempionluğu rəsmiləşdirmək niyyətindəyik. Amma bu, futboldur. Hər an hər şeyə hazır olmaq lazımdır. Əlimizdən gələndən daha çoxunu etməyə çalışacağıq.
- Mövsümü çempion kimi bitirdikdən sonra I Liqanı məğlubiyyətsiz başa vurmaq istəyirsinizmi?
- Hər şeydən əvvəl bizim qarşımıza qoyulan məqsədlər var. İlk məqsədimiz Premyer Liqaya vəsiqə qazanmaq, çempion olmaq idi. Bunlarla birlikdə mövsümü məğlubiyyətsiz başa vurmaq bizim özümüz üçün də xoş olar. Amma hər şeydən qabaq yuxarı səviyyəni düşünməli, ona uyğun futbol oynamalıyıq. Yuxarı səviyyə deyəndə Premyer Liqanı nəzərdə tuturam.
- Növbəti mövsüm Premyer Liqada çıxış edəcəksiniz. İddialı "Qəbələ" görə biləcəyikmi?
- Bəli. "Qəbələ" həmişə ölkə futboluna rəng qatıb. Çempionatdakı vacib, ən iddialı komandalardan biri olub. Avrokubokların qrup mərhələlərində çıxış edib, çempionluq uğrunda mübarizə də aparıb, ölkə kubokunu da qazanıb. "Qəbələ" Premyer Liqada çıxış etdiyi il iddialı olacaq.
- Özün necə növbəti komandada qalmaq istəyirsənmi?
- Əlbəttə. "Qəbələ" kimi komandada yer almaq mənim üçün də xoş olar.
- Bu barədə rəhbərliklə danışıq olubmu?
- İlk olaraq qarşımıza qoyulan məqsədə çatmaq istəyirik. Çempionatı başa vurduqdan sonra oturub danışmağa vaxtımız da olacaq. Düşünürəm ki, hər şey müsbət yöndə yekunlaşacaq.
