Sport24.az
"Maraqlı oyun alındı. Rəqibi tanıyırdıq, gücünü bilirdik, çox yaxşı futbol oynayırlar, yaxşı futbolçuları var. Bu sözləri Sport24.az-a açıqlamasında "Qarabağ"ın futbolçusu Elvin Cəfərquliyev deyib.
Cinah müdafiəçisi "Araz-Naxçıvan"a 3:1 hesabı ilə qalib gəldikləri Misli Premyer Liqasının XXVI turunun oyunu ilə bağlı fikirlərini bölüşüb:
"Meydanda da yaxşı futbol getdi. Azarkeşlər üçün də belə olduğunu düşünürəm. Sevincliyik ki, qalib gəlmişik. Fasilədə nələr danışıldığını eşitmədim. Çünki ehtiyat skamyasında idim. Düzdür, iki fərqli hissə izlədik. Sanki ikinci hissədə öz oyunumuzu tutduq, qalib gəldik".
O, "görüşün sonlarındakı insidentdə hakim sizə güzəştə getdimi" sualını cavablandırb:
"Mübahisə zamanı hakim mənə güzəştə getdi? Axı mən orada heç nə etmirdim. Rəqibin boğazından tutmaq deyəndə ki, mən orada oyunçuları aralayırdım. Başqa heç bir niyyətim yox idi. Heç bir kobudluqdan söhbət gedə bilməz. Hadisə nə üstündə baş vermişdi? İnanırsız, heç mən də o qədər dəqiqliyi ilə bilmirdim. Sadəcə epizod zamanı Felipe Santosu oradan aralaşdırırdım. Həmin oyunçu da mənim üzümə zərbə endirdi və yerə yıxılırdım".
Cəfərquliyev Azərbaycan Kubokunun yarımfinalında da bu rəqiblə üz-üzə gələcəklərini söyləyib:
"Biz onsuz da onların gücünə bələdik. Qarşıda da maraqlı oyun gözləyir. Hədəfimiz bu mövsüm "qızıl dubl" etməkdir".
