Idman.biz
"Qarabağ"ın futbolçusu Elvin Cəfərquliyevin İdman.biz-ə müsahibəsi
- Mövsümü necə dəyərləndirirsiniz?
- Məncə, mövsüm bizim üçün yaxşı keçdi. Çempion olduq və biz buna layiq idik. Bütün "Qarabağ" azarkeşlərini, məşqçilər heyətini, komanda yoldaşlarımı təbrik edirəm. Bu qalibiyyəti yerli çempionat üçün uğurlu nəticə hesab etmək olar. Ancaq təəssüf ki, avrokubok çıxışımız ürəyimiz istədiyi kimi alınmadı. Ümid edirəm ki, növbəti dəfə daha yaxşı çıxış edəcəyik.
- Başa çatmaqda olan futbol ilində hansı oyun sizin üçün daha yaddaqalan oldu?
- Əlbəttə ki, peşman olduğum oyunlar da çox olub. Bildiyiniz kimi, mövsüm ərzində qırmızı vərəqələr də almışam. Ən yadda qalan oyunum isə Avropa Liqasında "Tottenhem"lə matç olub. Həmin oyunda uduzsaq da, fərdi baxımdan mənim üçün yaxşı məqamlarla yadda qaldı.
- Gələn il "Qarabağ"la müqaviləniz bitir. Bu haqda nə düşünürsünüz?
- Bu suala cavab vermək istəmirəm, ümumiyyətlə bu haqda danışmaq üçün hələ tezdir.
- Elvin, siz niyə belə aqressivsiniz?
- Sizin kimi aqressiv olduğumu düşünənlər məni həyatda tanısaydılar, belə deməzdilər. Elə ki, stadiona girirəm, aqressivləşirəm. Bəzi şeylər özümdən asılı olmur. Düzdür, bilirəm ki, buna nəzarət etməliyəm. Ancaq aqresiyya olmadan da oynamaq mümkün deyil. Unutmamalıyıq ki, futbol həm də aqressiya oyunudur.
- Bu aqressiyanı azaltmaq üçün hansısa addımlar atırsınız?
- Əlbəttə, öz üzərimdə işləyirəm. Çalışıram ki, psixoloji olaraq özümü oyuna hazırlayım. Ümid edirəm ki, bundan sonra yaxşı olar.
Aytac Sahəd
İdman.biz
