Elvin Cəfərquliyev: Latviya oyunu, yeni taktika və azarkeşlərin səbri haqqında

Azərbaycan millisinin futbolçusu Elvin Cəfərquliyevin Offsideplus.az-a müsahibəsi

- Yığmamız yoldaşlıq görüşündə Latviya ilə heç-heçə etdi. Oyunla bağlı təəssüratlarınız necədir?

- Pis oynamadıq. Komanda şəklində mübarizə apardıq. Öz-özümüzə söz vermişdik ki, ilk növbədə qol buraxmayaq. Eyni zamanda əlimizə düşən fürsətlərdən yararlanmağa çalışdıq. Fərqlənmək üçün heç də az şansımız olmadı. Rəqib qapısı önündə 2 real qol epizodu yaratdıq. Düşünürəm ki, bu şanslardan yararlansaydıq, qalib gələ bilərdik. Qələbə sayəsində xalqımızı sevindirməyi çox istəyirdik. Məşqçimiz təzədir. Bizə müəyyən taktiki gedişləri, oyundakı problemləri göstərir. Bizdən necə futbol gözlədiyini başa salır. "5"-li taktika (5-3-2 sxemi - red) ilə oynayırıq. Buna yenilik demək olar. Çünki əvvəllər arxa xəttdə 5 yox, 4 müdafiəçi yer alırdı.

- Bu taktiki sxemdə özünüzü necə hiss eləyirdiniz?

- Mən qabaqlar 5-3-2 taktiki sxeminə uyğun çıxış etmişəm. Mənim üçün heç bir problem yox idi. Düzdür, bu, 4 müdafiəçinin yer aldığı sxemdən fərqlidir. Sadəcə, "5"-li taktikada müdafiədə daha çox top alırsan, hücumların əksəriyyəti cinahlardan qurulur. Ümumilikdə, şəxsən mənim üçün heç bir maneə yox idi, bu, mənim öyrəşdiyim taktikadır.

- Bildirdiniz ki, bu oyunda ən ümdə vəzifə qol buraxmamaq idi. Belə demək olarmı ki, yığma üzvləri də artıq məğlubiyyətlərdən beziblər?

- Məqsədimiz arxaya oturub hesabı saxlamaq deyildi. Ancaq uduzmamaq istəyirsənsə, qapını toxunulmaz saxlamalısan. Sırf niyyətimiz bu idi ki, rəqibə az qol imkanı verək, əks-hücumlar zamanı irəlidə çoxluq yaradıb fərqlənək.

- Sanki "Qarabağ"ın yığmada yer alan futbolçuları yorğun görünürdülər. Ağır mövsüm keçirmisinz, 1 həftə əvvəl ölkə kubokunun finalında 120 dəqiqə mübarizə aparmısınız və dərhal milli komandanın düşərgəsinə gəlmisiniz. Öz oyununuzdan razı qaldınızmı?

- Yorğunluq ola bilər. Üstəlik hava şəraiti də əlverişsiz idi. Bürkü idi, gün ərzində bir neçə dəfə hava şəraiti dəyişdi: yağış yağdı, sonra gün çıxdı. Stadionun ot örtüyü də quru idi. Təxminən 70-ci dəqiqələrdən sonra yorğunluq hiss edirdim. Bu, normal haldır. Çünki 5-3-2 taktiki sistemində ən çox güc cinah oyunçularının üzərinə düşür. Arxa və ön xəttdə çatdırmalısan. Ona görə qarşılaşmanın axırlarına doğru yorulmuşdum.

- İki gündən sonra Bakıda Macarıstana qarşı yoldaşlıq görüşü keçiriləcək. Budəfəki rəqib Latviyadan dəfələrlə güclüdür, heyətdə hətta ulduz futbolçuları var. Bu matçdan nə gözləyə bilərik?

- Yaxşı bərpa prosesi keçmək lazımdır ki, Macarıstanla oyuna hazır olaq. Rəqibimiz çox güclüdür. Oyunlarını izləmişik. Doğma publika önündə yaxşı çıxış etmək üçün əlimizdən gələni əsirgəməyəcəyik. Bacardığımız qədər çox qol imkanları yaratmağa çalışacağıq. Müdafiədə bəzi boşluqları aradan götürməliyik. Arxa xəttdə etibarlı oynayacağımız təqdirdə macarlara qol imkanı vermərik və onlara çətinlik yaşatmış olarıq.

- Milli komandamız artıq 9 oyundur qələbə qazana bilmir. Azarkeşlər səbirsizliklə bu uğursuz seriyanın qırılmasını gözləyirlər. Yığmanın aparıcı futbolçularından biri kimi fanatlara nə sözünüz var?

- Mən azarkeşləri çox yaxşı başa düşürəm. Onlar milli komanda səviyyəsində qələbə qazanmağımızı istəyirlər. Bu, onların haqqıdır. Sadəcə, azarkeşlər də anlasınlar ki, biz də qalib gəlmək istəyirik. Ancaq bəzən hər şey öz əlimizdə olmur. Qələbəni, uğuru biz də arzulayırıq. Azarkeşlər səbrli olsunlar, gələcəyə nikbin baxsınlar. İnşallah, gələcəkdə milli komanda öz oyun üslubunu tapıb nailiyyət qazanar. Bir az səbrli olsunlar.

İdman.biz