Sport24.az
"Sabah"ın kapitanı Elvin Camalov Sport24.az-a müsahibə verib. 29 yaşlı yarımmüdafiəçi komandasının yeni başlayan hazırlıq prosesi və Konfrans Liqasında üz-üzə gələcəkləri "Makkabi" barədə fikirlərini bölüşməklə yanaşı, hazırda davam edən qitə çempionatı ilə bağlı danışıb.
- Hazırlıq prosesi necə davam edir?
- Bir neçə gündü məşqlərə baslamışıq. Hazırlığın ilk günlərini Masazırda keçdik. Dünəndən isə məşqlərimizi Qəbələdə davam etdiririk. Toplanış yaxşı keçir. Yeni başlasaq da, hamı çox həvəslə çalışır. Hər kəs bizi qarşıda vacib oyunların gözlədiyini anlayır. Ona görə də məşqlərdə maksimum gücümüzü ortaya qoyuruq.
- Püşk qarşınıza Hayfa "Makkabi"sini çıxartdı. Rəqiblər bağlı fikirlərini bilmək istərdik...
- Püşk qarşımıza ən çətin rəqibi çıxardı desəm, yanılmaram. Bizi avrokuboklarda təcrübəli və ciddi rəqib gözləyir. Amma təslim olmaq fikirimiz yoxdu. Futbolda mümkünsüz nəsə yoxdu. Meydana çıxıb son dəqiqəyə kimi döyüşəcəyik. Ötən mövsüm də qitəmiqyaslı yarışda pis çıxış etmədik. Çalışacağıq ki, bu il daha yaxşı performans sərgiləməklə azarkeşlərimizi sevindirək.
- Hazırda Almaniyada davam edən qitə çempionatı ilə bağlı fikirlərini bölüşərdin.
- Maraqlı, bol qollu turnir izləyirik. Qolların çox olması azarkeşləri də razı salır. Fikrimcə, qarşıda bizi daha maraqlı oyunlar gözləyir.
-Hansı komandaya azarkeşlik edirsən?
- Bizə qardaş olan Türkiyə millisinə azarkeşlik edirəm. Onlar Portuqaliya ilə oyunda məğlub olsalar da, qrupdan çıxmaq şansları var. İnşaallah, bunu bacararlar.
- Bəs hansı yığmanı turnirin favoriti görürsən?
- Favorit kimi Almaniyanın adını çəkə bilərəm. Onlar həm ev sahibləridi, həm də güclü heyətə malikdilər. Onların "doğma divarlar" arasında oynaması əlavə motivasiyadır. Fikirimcə, almanlar şanslarından maksimum istifadə edəcəklər.
ABDULLA İSMAYILOĞLU
