Idman.biz
"Neftçi"nin yarımmüdafiəçisi Elvin Camalovun Futbolxeber.az saytına müsahibəsi
- Azərbaycan Premyer Liqasının XXXI turunda "Qarabağ"a uduzdunuz. 0:3 hesablı məğlubiyyətə səbəb nə oldu?
- Belə qarşılaşmalar həmişə çətin keçir. Ümumiyyətlə, "Qarabağ"a qarşı asan oyun olmur. Meydana qələbə qazanmaq əzmi ilə çıxmışdıq. Təəssüf ki, alınmadı. Öz səhvimizdən qollar buraxdıq. Bu da nəticəyə təsir etdi.
- "Neftçi" demək olar ki, bütün komponentlərdə "Qarabağ"dan geri qalırdı. Bunu nə ilə əlaqələndirmək olar?
- Razıyam ki, çətinliklər oldu. İstədiyimiz oyunu sərgiləyə bilmədik. İkinci hissə toparlanmağa çalışsaq da, yaxaladığımız epizodları dəyərləndirə bilmədik. Halbuki şanslarımızdan istifadə etsəydik, hesab fərqli olardı.
- Ola bilərmi ki, "Neftçi"nin hazırda fikri daha çox kubokdadır?
- Deməzdim. Hər oyuna ciddi hazırlaşırıq. Bəli, avrokuboklara ən real yol bizim üçün kubokdur. Lakin "Qarabağ"la matçlar derbi xarakteri daşıyır. Azarkeşlərin gözlədiyi oyundur. Çalışırdıq ki, yaxşı mübarizə aparaq və azarkeşləri sevindirək. Təəssüf ki, alınmadı. Ümid edirik ki, kubokda azarkeşlərimizi sevindirəcəyik.
- Əzəli rəqibə böyük hesablı məğlubiyyətdən sonra kubokın cavab matçına hazırlaşmaq çətin olmayacaq?
- Bu, səbəb ola bilməz. Çünki "Qarabağ"ın da kubok oyunu var. Vaxt az olsa da, əsas psixoloji hazırlaşmadir. Yanaşmamız ciddi olsa, hazırlaşmaq problem deyil, belədə bərpa prosesini rahat keçəcəyik. Bu, əsasən beyinlə əlaqəlidir.
- "Sabah"ın sizə qarşı irəli sürdüyü ittihamlarla bağlı hələ də cavab verməməsiniz...
- Hələlik bu barədə danışmaq istəmirəm. Bir qədər zamana ehtiyac var. Mənə dəstək olan hər kəsə minnətdaram.
İdman.biz
