Idman.biz
"Neftçi"nin müdafiəçisi Elvin Bədəlovun Futbolxeber.az-a müsahibəsi
- "Turan Tovuz"la matçda meydanı xalsız tərk etdiniz. 0:1 hesablı məğlubiyyəti nə ilə əlaqələndirmək olar?
- Çətin oyun keçdi. Erkən, gözlənilməz qol buraxdıq. O qol bizi çox üzdü. Lakin yenə də oyundan qopmadıq. Çalışdıq, imkanlarımız da oldu. Lakin təəssüf ki, qələbə qazana bilmədik. İkinci hissədə azlıqda qaldıq. Bu, işimizi daha da çətinləşdirdi. İrəli getdik, qol vurmaq üçün çox çalışdıq, amma alınmadı.
- Sizcə, İqor Ribeyroya göstərilən qırmızı vərəqə nə dərəcədə doğru qərar idi?
- Epizodu izlədim. Düzdür, təmas var idi. Lakin ciddi bir şey deyildi. Rəqib futbolçu da təxribat elədi. Hər ikisinə sarı vəqərə düşürdü
- Üç oyuna, iki xal və bir qol. Nə çatışmır, problem nədədir? "Neftçi" nə üçün uğur qazana bilmir?
- Düzdür, nəticələr ürəkaçan deyil. Lakin bu oyunda görsəndi ki, komandada irəliləyiş var. Sadəcə bir qədər vaxt lazımdır. Oyun olaraq belə davam etsək, daha yaxşı vəziyyətə gələcəyik. Başa düşürəm, həm oyun, həm də nəticəyə ehtiyac var. Çalışacağıq vəziyyəti dəyişək.
- Bu məntiqlə fasilə "Neftçi"nin xeyrinə olmalıdır...
- Elədir. Sadəcə bu matçda rəqib təhlükə yaratmadan qol vurdu, qəribə, dəhşət bir şeydir. Düzdür, sonda "Turan Tovuz"un şansları var idi, ikinci qolu da vura bilərdilər. Lakin bu, normaldır, çünki bütün komanda ilə irəli atılmışdıq. Belədə arxada boşluqlar yaranırdı.
- Millinin heyəti açıqlandı. Sizin adınız da siyahıda var. Qarşıdakı matçlardan gözləntiləriniz?
- Milliyə dəvət aldığım üçün çox şadam. Çalışacağıq uğur qazanaq, xalqımızı sevindirək. Millidə də nəticələr yaxşı deyil. Son oyun bir qədər ümid yaradıb. İslandiya ilə matçda yaxşı nəticə qazansaq, ardı gələcək.
- İslandiya və Ukraynanı rəqib qismində necə dəyərləndirə bilərsiniz?
- Rəqiblər haqda ümumi məlumatımız var. Oyunlarını izləmişəm. Lakin daha ətraflı məlumatı məşqçilər korpusu təlim-məşq toplanışında verəcəklər.
İdman.biz
