Sport24.az
"Oyuna yaxşı başladıq, topa nəzarət də bizdə idi. Düşünürəm ki, erkən qol vursaydıq, daha yaxşı olardı. III turda da aktivimizə 3 xal yazdığımıza görə sevinirəm". Bu sözləri Sport24.az-a açıqlamasında "Sumqayıt"ın futbolçusu Elvin Bədəlov deyib.
Təcrübəli müdafiəçi komandasının oyununu şərh etməklə yanaşı, Konfrans Liqasında məğlub olduqları "Fehervar"la oyunlardan da danışıb: "Geridə qalan 3 turda böyük kobud səhvlər etmişik desəm, düz çıxmaz. Amma nöqsanlarımız var, bu da normaldı. Hələ çempionatın başlanğıcıdı, komanda oyununu hələ tam tapmayıb. Turdan-tura inkişaf edəcəyik. Arada kollektivlə oturub "Fehervar"la qarşılaşmalarımız barədə söhbət edirik ki, filan səhvləri etməsəydik, mərhələni keçə bilərdik. Amma bunu sadəcə, xatirə kimi yada salırıq. O oyun bitib, nəticəsi də bəllidir. Odur ki, "Fehervar"a məğlubiyyət kitabını bağlamışıq. Hazırda bütün diqqətimizi çempionata cəmləmişik".
Yığma üzvü milliyə dəvət gözlədiyini də vurğulamağı unutmayıb: "Yığmanın yeni baş məşqçisi Fernandu Santuşdan dəvət gözləyirəm. Çağırsalar canla-başla milli üçün oynamağa hazıram".
Qeyd edək ki, Premyer Liqanın III turunda "Sumqayıt" öz meydanında "Səbail"i 2:1 hesabı ilə məğlub edib.
ABDULLA İSMAYILOĞLU
