Sport24.az
"Oyunun çətin keçəcəyini əvvəlcədən bilirdik. Bu komanda həqiqətən çox güclüdür". Bu sözləri Sport24.az-a açıqlamasında "Kəpəz"in futbolçusu Elmir Tağıyev deyib.
24 yaşlı yarımmüdafiəçi "Qarabağ"la qolsuz heç-heçə etdikləri Misli Premyer Liqasının XXVII turunun oyunu ilə bağlı fikirlərini bölüşüb:
"Qarşılaşmaya olduqca ciddi hazırlaşmışdıq. Bir xala görə komanda yoldaşlarımı təbrik edirəm. "Sumqayıt"la səfər görüşündə gözlənilmədən məğlub olduq. Bu səbəbdən kollektivdə müyyən qədər ruh düşkünlüyü var idi. Şükürlər olsun ki, "Qarabağ"la matçda əldə etdiyimiz nəticə özümüzə güvəni geri qaytardı".
Tağıyev milli fasilədən maksimum yararlanmaq istədiklərini bildirib:
"Gücümüzü bir qədər də artırıb, "Səbail"lə görüşdən qalib ayrılmağı planlaşdırırıq. Qazanacağımız qələbə bizi I Liqaya düşmə zonasından bir qədər də uzaqlaşdıracaq. Həmin matç qarşılaşma 6 xala bərabər olacaq".
Qeyd edək ki, XXVII tur çərçivəsində baş tutacaq "Kəpəz" - "Səbail" matçı martın 28-nə təyin olunub.
