Idman.biz
"Kosovo çempionatının səviyyəsi çox yaxşıdır. Burada çox dinamik futbol oynanılır".
Bunu apasport.az-a müsahibəsində Kosovonun "Dreniça" klubunda oynayan həmyerlimiz Elmir Tağıyev deyib.
Həmin müsahibəni təqdim edirik:
- Kosovoda işlər necə gedir? Artıq yeni komandanda debüt etdin…
- Kosovoya gəldiyim üçün şadam. Sadəcə, bura gələndə yüngül zədəm var idi. Ona görə bir müddət oynamadım. Artıq yaxşıyam, debüt etdim və buna görə sevinirəm. Təəssüf ki, həmin oyunda uduzduq. Amma məşqlərdə daim əlimdən gələni edirəm.
- Maraqlıdır ki, bu həftə qarşılaşdığınız rəqibin heyətində digər azərbaycanlı futbolçu Yusif İmanov da var idi. Onunla matçdan əvvəl və ya sonra danışdınmı?
- Bəli, Yusif meydana çıxmasa da, "23-lük"də adı var idi. Onunla görüşdük, söhbət etdik.
- Yusiflə bu oyundan qabaq da görüşmüşdün, yoxsa ilk dəfə idi? Səncə, sizin komanda güclüdür, yoxsa onların?
- Yusiflə oyundan əvvəl də görüşmüşdük. Kosovada qalırıq deyə, görüşmək imkanımız olmuşdu. Onların komandası da yaxşı heyətə malikdir. Əslində, "Malişeva"ya qalib gələcəyimizə inanırdım, amma alınmadı. Artıq onlar bizə çatdılar, bir xallıq fərq qaldı. Ümumilikdə burada klubların səviyyəsi yaxşıdır.
- Liqanın səviyyəsi barədə nə deyə bilərsən?
- Kosovo çempionatının səviyyəsi çox yaxşıdır. Burada çox dinamik futbol oynanılır. Demək olar ki, bütün komandalar sürətli futbol nümayiş etdirir. Həqiqətən güclü liqadır.
- "Dreniça"ya və ümumilikdə Kosovaya adaptasiya ola bilmisən?
- Burada əsasən məşqlərə gedirəm, sonra vaxtımı evdə keçirirəm. Ara-sıra komanda yoldaşlarımla görüşürəm, birlikdə vaxt keçiririk. Hər halda, adaptasiya olduğumu deyə bilərəm.
- Kosovodakı gündəlik həyat rejimin necədir?
- Artıq bir aydır buradayam. Komandada məni çox yaxşı qarşıladılar. Özümü xoşbəxt hiss edirəm. Yavaş-yavaş daha çox oynamaya başlayacağıma inanıram.
- "Dreniça" hazırda çempionatda 4-cü yerdədir. Çempionluq şansınız varmı?
- Komandamız həqiqətən yaxşıdır. İnanıram ki, hətta Kosovo çempionu ola bilərik. Bunun üçün çalışırıq, hər oyunda qələbəyə oynayırıq. Mən də komanda üçün ən yaxşısını vermək istəyirəm. Ümid edirəm ki, çempionluq uğrunda sona qədər mübarizə aparacağıq. Gücümüz buna çatır, çünki yaxşı heyətimiz var.
