Idman.biz
"Araz-Naxçıvan" Azərbaycan Premyer Liqasının 2-ci turu çərçivəsində səfərdə "Turan Tovuz"a 2:1 hesabı ilə qalib gəlib.
İdman.biz xəbər verir ki, komandanın baş məşqçisi Elmar Baxşıyev oyundan sonra jurnalistlərin suallarını cavablandırıb.
O, matçda onları nə gözlədiyini əvvəlcədən bildiklərini deyib: "Ağır oyun alındı. Hər iki komanda meydançada çoxlu mübarizə apardı. Bu gün meydanda istədiyimizi etməyə çalışırdıq. İstədiyim komandanı gördüm. Biz də bilirik ki, çempionatın əvvəlidir. Getdikcə, hücum və müdafiə planında daha da yaxşı komanda olacağıq".
Baxşıyev komandasının mübarizə ruhundan razı qaldığını bildirib: "Bu gün yaxşı mübarizəli oyun getdi. Futbolçular bu tempə, dinamikaya öyrəşirsə, təqdirəlayiqdir. Düşünmürəm ki, avrokuboklar bizə müsbət və ya mənfi təsir edə bilər. İlk dəfə ölkəmizi avrokubokda təmsil edirdik. Biz də başımızdan yuxarı tullanmağa cəhd etdik, amma alınmadı".
Baş məşqçi ona qarşı səsləndirilən tənqidlərə və yayılan şayiələrə də münasibət bildirib: "Beş ildir mövsümün əvvəli məni istefaya göndərirlər. Şayiələr normaldır. Onu da hansısa insanlar yaradır. Şayiələrə fikir verib, işimizə yanaşsaq, özümüz-özümüzü geri salmış olacağıq. Tənqidi qəbul edirik. Biz də komanda olaraq, artığını etməyə çalışdıq. Futbolda hər şey istəklə bağlı deyil. Ümidverici odur ki, komandam o geridönüşü etməyi bacarır. Kollektiv bərkdir, onlara inanıram. Getdikcə daha da yaxşı "Araz-Naxçıvan" görəcəksiz".
Penalti epizodu ilə bağlı sualı da cavablandıran Baxşıyev qərarla razı olmadığını qeyd edib: "Mən də planşetdən baxıram. Ucuz penaltini heç öz lehimizə də istəmərəm. Penalti qərarı səhv idi".
İdman.biz
