Idman.biz
"Hazırlıq plana uyğun şəkildə keçdi. Gün ərzində iki məşq keçirdik. Əvvəlcədən nəzərdə tutulduğu kimi, 3-4 yoxlama matçı keçirmək istəyirdik ki, buna da nail olduq. Komanda üzvləri verdiklərimizi məşq zamanı bizə qaytarmağa çalışdı".
Bu sözləri Sport24.az-a açıqlamasında "Araz-Naxçıvan"ın baş məşqçisi Elmar Baxşıyev deyib.
Təcrübəli mütəxəssis rəqiblərindən 3-nün Super Liqa komandası olması da onları məmnun edib: "Bir sözlə, 2 həftəlik perioddan maksimum istifadə etməyə çalışdıq. Faydalı bir toplanış keçirdik. Qarşıdakı oyunlarda və çempionat zamanı bunu faydasını görəcəyik".
Baş məşqçi komandasının Türkiyədə keçirtdiyi təlim məşq toplanışından razı qaldığını bildirib: "Aris"lə oyunun hazırlığının son hissəsini Bakıda reallaşdıracağıq. Toplanış vaxtı müəyyən yükləmələr verildi, taktiki-texniki çalışmalar oldu. Bunun bəhrəsini tədricən görəcəyik. Ona görə komandanın 100 faiz hazır olduğunu demək olmaz. Ancaq bu göstəricinin 70-80 faizə yaxın olduğunu düşünürəm. Qeyd etdiyim kimi, son 3 matçdakı rəqibimiz Türkiyə Super Liqasında oynayan komandalar idi. Bu cür güclü rəqiblərlə oyunlarda həm taktiki, həm fiziki, həm də funksional hazırlığa baxmaq, xətlər arası əlaqələri yoxlamaq və yaxşılaşdırmaq, səhvləri görmək və üzərində işləmək olur. Həm də çalışdıq ki, toplanışa gətirdiyimiz futbolçuların hamısına şans verək. Futbolçulardan razı qaldım. Həvəsli və istəkli idilər. Baxmayaraq ki, hava isti idi, məşqlə bağlı hansısa problemimiz olmadı. Oteldə qidalanma, məşq meydançaları da yaxşı vəziyyətdə idi. İnşallah, bunun faydasını oyunlarda görəcəyik".
Qeyd edək ki, Konfrans Liqasında mübarizə aparacaq "Araz-Naxçıvan"la "Aris" arasında II mərhələnin ilk oyunu iyulun 24-də Bakıda, cavab matçı isə ayın 31-də Yunanıstanda baş tutacaq.
İdman.biz
