Idman.biz
"İyulun 6-dan hazırlığımızı Ərzurumda davam etdiririk. Gün ərzində 2 məşq keçirik".
İdman.biz xəbər verir ki, bunu "Araz-Naxçıvan"ın baş məşqçisi Elmar Baxşıyev deyib.
O, Ərzurumda hazırlıq çərçivəsində bu gün "Bayburtspor"la keçirilən yoxlama oyununu dəyərləndirib. Baxşıyev mətbuat xidmətinə açıqlamasında bildirib ki, sınaq görüşlərində əsas məqsəd komandanı yoxlamaqdır: "Futbolçular günün birinci yarısında fitnes-zalda, ikinci məşqi isə meydanda reallaşdırır. Bu ilk yoxlama oyunumuz idi. Əlbəttə, rəqibimizin nəyə qadir olduğu haqda məlumatlı idik. Ona görə də bütün futbolçuları sınamaq və oyun ritminə gətirmək istəyirdik. Məqsədimiz yeni futbolçuların komandaya uyğunlaşması, xətlərarası əlaqənin yaxşılaşdırılması idi. Bu cür oyunlarda nəticə yox, meydana çıxan futbolçuların verilən tapşırıqları nə dərəcədə icra etməsidir. Hər kəs istəkli idi. Çalışmalarımız davam edir. Rəsmi oyuna qədər olan müddətdən maksimum istifadə etmək və hazır olmaq istəyirik".
Qeyd edək ki, "Araz-Naxçıvan" Türkiyə təmsilçisi ilə qarşılaşmada 14:0 hesabı ilə qalib gəlib.
İdman.biz
