Elman Sultanov: “Qəbələ”ni çıxmaq şərtilə hamı bir-birini uda bilər"

Birinci Liqada çıxış edən "Baku Sportinq"in baş məşqçisi Elman Sultanov Sport24.az saytına müsahibə verib.

- Son oyunda MOİK-ə məğlubiyyət haqda nə deyə bilərsiniz?

- Oyunu biz oynadıq, rəqib uddu. Qol imkanlarımız oldu, hətta topumuzun biri dirəkdən döndü. Rəqib isə standart vəziyyətdən fərqləndi.

- Çempionata uğurlu başlamışdınız. Nəticələrin yaxşı olmasına nə mane oldu?

- Heyətimiz əsasən gənclərdən qurulub, onların bəziləri Birinci Liqada oynamaq təcrübəsinə malik deyillər, üstəlik çox geniş heyətə də malik deyilik. Hazırda Birinci Liqada çıxış edən klublar isə, "Cəbrayıl" istisna olmaqla ən azı ikinci ildir ki, bu liqada oynayırlar.

- Aşağı pillədə olan komandalarla xal fərqiniz böyük deyil. Bu sizi narahat edir?

-  Əlbəttə narahat edir. Biz uğurlu seriya yaxalamışdıq və liderlər qrupuna yaxınlaşmışdıq, təəssüflər olsun ki, son iki matçda yaxşı futbol nümayiş etdirsək də, uduzduq.

- Mövsümün əvvəlində komandanın qarşısına hansı hədəf qoyulmuşdu?

- Biz bu liqada debütant komandayıq. Hədəfimiz turnir cədvəlində irəliləyə biləcəyimiz qədər irəliləməkdi.

- Mövsümün geridə qalan hissəsini necə dəyərləndirirsiniz?

- Bu il Birinci Liqa çox yaxşı səviyyədə keçir. "Qəbələ", "İmişli", "Karvan" kimi güclü heyətə malik kollektivlər var. Arxada qalan turlar onu göstərdi ki, "Qəbələ"ni çıxmaq şərtilə hamı bir-birini uda bilər.