Əliyar Ağayev səhv edib?

Misli Premyer Liqasının VI turunun son oyununda, daha dəqiq desək, "Sabah" – Turan Tovuz" matçında yaşananlar ətrafında gedən müzakirələr dünəndən bu yana bitmir. Qısaca xatırladaq ki, görüşün əsas vaxtına əlavə olunmuş son saniyələrdə qonaqlar künc zərbəsindən sonra fərqlənsələr də, baş hakim Əliyar Ağayev köməkçisi Akif Əmirəlinin işarəsi ilə qolu qeydə almadı. Laysmanın fikrincə, top havada olarkən qapı xəttini keçmişdi.

Bəzilərinin fikrincə, köməkçi hakim düz qərar verib. Ancaq çoxluq laysmanın yanlışlığa yol verdiyini, Ağayevin də ona görə "yandığı"nı fikirləşir. FİFA referisinin VAR-a müraciət etməməsi də müəyyən söz-söhbətə rəvac verib.

Obyektivliyi təmin etmək üçün Sport24.az olaraq hazırda Premyer Liqa matçlarına təyinat alan, ancaq adının açıqlanmasını istəməyən ədalət təmsilçilərindən biri ilə əlaqə saxladıq. Ona "belə vəziyyətdə VAR-a niyə müraciət olunmadı" sualını ünvanladıq.

Təcrübəli referinin isə yaşananlara reaksiyası belə oldu: "Bu epizodda Əliyar Ağayevin ümumiyyətlə günahı yoxdu. FİFA referisi yan xətt hakiminin qərarına əsasən qolu qeydə almadı. VAR-da bu vəziyyət mütləq qaydada baxılır. Burda iki variant var. Ya qərarın düzgün olduğu təsdiqini tapır, ya da əksinə, VAR-da əyləşənlər azarkeşlərin görmədiyi VAR kamerasına baxıb laysmanın səhv etdiyini, topun qapı xəttini keçmədiyini, qolun qaydalar çərçivəsində vurulduğunu bildirir.

İkinci variant isə budu ki, ola bilər, VAR-da oturanlar epizodu dəqiq görə bilmirlər. Belə olan halda son tövsiyyə odu ki, VAR hakimi baş hakimi narahat etməsin və meydanda olan ədalət təmsilçilərinin qərarına hörmətlə yanaşsın. Bu gün hamı Əliyarın üstünə getsə də, bu vəziyyətdə onu qınamağın yeri yoxdu. Çünki qərar baş hakimə məxsus deyil".