Sport24.az
"Kəpəz"in futbolçusu Əli Səmədov Sport24.az-a müsahibə verib. 26 yaşlı yarımmüdafiəçi həm komandasının uğursuz oyunlarını şərh edib, həm də bizi maraqlandıran başqa sualları cavablandırıb
- Geridə qalan son üç oyunla bağlı fikirlərin maraqlıdı...
- Bütün oyunlara yaxşı hazırlaşırıq. Kollektiv arasında heç bir problem yoxdu. Oyunlara yaxşı motivasiya ilə çıxırıq. Meydanda maksimum çalışırıq ki, rəqiblərdən xal qoparaq. Amma hələki arzuolunan nəticələr qazana bilmirik. Ötən mövsüm komandadan gedənlərimiz çox oldu. Əvəzində yeni oyunçular gəldi. Təzə qoşulanlar komandaya tam uyğunlaşmayıb. Düşünürəm ki, irəlidəki turlarda futbolçuların adaptasiya prossesi başa çatacaq, həmçinin buraxdığımız səhvlərdən dərs çıxaracağıq.
- Səncə, komandanın oyununda nə çatmır?
- Səbəbin birini yuxarıda qeyd etdim ki, hələlik yeni gələnlər kollektivə tam uyğunlaşmayıb. Ardıcıl üç oyundu məğlub oluruq, təbii ki, bu da komandada müəyyən qədər ruh düşkünlüyü yaradır. Məşqlərdə maksimum çalışırıq ki, uğursuz nəticələri yaddan çıxaraq və qələbə ruhu ilə hazırlaşaq. Bizə bir qələbə və ya xal lazımdı. Fikrimcə, bundan sonra istədiyimiz relsə düşəcəyik.
- Necə düşünürsən, yenilərin komandaya uyğunlaşması üçün nə qədər vaxt lazımdı?
- Üç mövsümdü ki, eyni hal təkrarlanır. Çempionata yaxşı başlaya bilmirik. Amma turlar arxada qaldıqca toparlanır və daha yaxşı çıxış edirik. Məncə, iki-üç turdan sonra meydanda istədiyimiz oyunu sərgiləyib xallar qazanacağıq.
- Legionerləriniz yerli oyunçulardan heç nəyi ilə fərqlənmir. Sənə elə gəlmir ki, bu mövsüm daha keyfiyyətsiz əcnəbilərlə "güclənmisiz"?
- Belə deməzdim. Hazırda heyətimizdəki legionerlərin hər biri məşqlərdə maksimum çalışmaqla özlərini yaxşı tərəfdən göstərir. Sadəcə yuxarıda dediyim ki, hələ təzədilər və komandaya uyğunlaşa bilməyiblər. Adaptasiya prossesini keçəndən sonra onların necə faydalı olduqlarını hamı görəcək. Nəzərinizə çatdırım ki, Martins, Mate, Latir kimi legionerlər də bizə yeni qoşulanda zəif çıxış edirdilər. Amma zaman keçdikcə onlar "artırdılar". Bu ssenari yenə təkrarlanacaq.
- Son turda "Turan Tovuz"la qarşılaşdız. Səncə Qərb derbisi alındı?
- Düzdü, məğlub olduq, amma düşünürəm ki, yaxşı matçı oldu. Əvvəlki oyunlarla müqayisədə bu qarşılaşmada bir qədər yaxşı çıxış etdik. Fikrimcə, azarkeşlər üçün futbol bayramı oldu. Bizi heç vaxt tək buraxmayan fanatlarımıza da təşəkkür edirəm.
- Demək olar hamı sizi autsayder gözündə görür və elitanı tərk etməyə əsas namizəd sayır. Bu üzərinizdə əlavə təzyiq yaratmır?
- Qətiyyən. Heç bunu ağlımıza da gətirmirik. Mövsümdə cəmi 3 oyun keçirmişik. Çempionat uzun marafondu.
ABDULLA İSMAYILOĞLU
