Sport24.az
"Matça qələbə üçün çıxmışdıq. Hesabda iki dəfə geri düşdük, amma üç xal əldə edəcəyimizə inanırdım".
Bunu Sport24.az-a "Kəpəz"in futbolçusu Əli Səmədov deyib.
27 yaşlı yarımmüdafiəçi "Sabah"a 3:2 hesabı ilə qalib gəldikləri Premyer Liqanın XXI turunun oyunu ilə bağlı fikirlərini bölüşüb:
"Vacib qələbə qazandıq. Komanda yoldaşlarıma təşəkkür edirəm ki, həvəsdən düşmədik, sonadək döyüşdük. Məhz bunun nəticəsində qalibiyyət əldə etdik. Qazana biləcəyimiz hər xal Premyer Liqada qalmaq baxımından çox önəmlidir. Mövsümün sonunda bir xal belə bizə lazım ola bilər. Əlimizdən gələni etməyə, xal və xallar toplamağa çalışırıq. Hər matça da məhz bunun üçün çıxırıq".
Görüşdə fərqlənən oyunçu bunun üçün sevindiyini söyləyib: "Əsas komandamızın istədiyi nəticəni əldə etməsidir. Amma mənim üçün də fərqlənmək sevindirici haldır".
O, son olaraq XXII turda "Araz-Naxçıvan"la üz-üzə gələcəkləri qarşılaşmaya toxunub: "Güclü rəqibdir. Çempionatda ikinci pillədə qərarlaşıblar. Amma biz yenə xal qazanmağı hədəfləyəcəyik. Heç bir rəqindən də çəkinmirik".
