Sport24.az
"Milli görə yaranmış fasilədə komanda olaraq yaxşı hazırlıq keçdik. Hazırkı vəziyyətimizlə bağlı futbolçularla söhbətimiz olub". Bu sözləri Sport24.az-a açıqlanmasında "Kəpəz"in futbolçusu Əli Səmədov deyib.
Komandanın kapitanı Misli Premyer Liqasının 12-ci turunda "Karvan-Yevlax"la matçın hazırlığından danışıb:
"Karvan-Yevlax"la oyunda hədəfimiz 3 xaldır. Bunu bacarsaq, sonuncu pillədən qurtulacağıq. Üzərimizdə hər hansı təzyiq yoxdur. Nə olursa olsun, qalib gəlməliyik. Bizə zaman lazım idi. Əminəm ki, bu durumdan çıxacayıq".
Təcrübəli futbolçu son zamanlarda az oynaması ilə bağlı məsələyə də toxunub:
"Az oynamağımla bağlı Azər Bağırovla söhbətim olmayıb. Komandanın kapitanıyam. Nə zaman şans verilsə, əlimdən gələni edəcəm. Oynasam da, oynamasam da, komandamın yanındayam".
Qeyd edək ki, "Karvan-Yevlax" - "Kəpəz" matçı noyabrın 21-i, saat 14:00-da Yevlax şəhər stadionunda keçiriləcək.
