Sport24.az
"Kəpəz"in futbolçusu Əli Səmədovun Sport24.az-a müsahibəsi
- Misli Premyer Liqasının 31-ci turda "Şamaxı"ya 1:2 hesabı uduzdunuz. Oyunla bağlı fikirlərini bölüşərdin...
- Bizim üçün vacib qarşılaşma idi. Bu rəqiblə xal fərqimiz üçə bərabər idi. Yeddinci pilləyə yüksəlmək istəyirdik. Çətin keçəcəyini bilirdik. Buna baxmayaraq yaxşı mübarizə apardıq. Bizim daha çox qol epizodumuz oldu. Amma "Şamaxı" fürsətləri dəyərləndirdi və qalib gəldi.
- Rəqib hesabı açsa da, bərabərliyi təmin etmişdiniz. Hesabı qorumağa nə mane oldu?
- Matça qələbə üçün çıxmışdıq. Komanda olaraq pis oyun sərgiləmədik. Sadəcə, son epizodlardan yararlana bilmədik. Qapıçı ilə təkbətək qaldığımız anlarlardan da istifadə etmədik. Nəticə, rəqib 2-3 dəfə qapımıza gəldilər və daha dəqiq oynadılar. Ən azı heç-heçəyə layiq idik.
- Bir gün əvvəl əsas rəqibiniz "Səbail"in məğlub olması sizdə arxayınlıq yaratmışdı?
- Xeyr. Mən elə deməzdim. Biz də istəyirik ki, daha yuxarı pillələrdə qərarlaşaq. Mövsümü daha yuxarı sırada bitirsək, bu, bizə əlavə motivasiyadır. Hər görüşə qələbə üçün çıxırıq.
- Sona beş tur qalıb. Ümumiyyətlə "Səbail"in sizə çatması mümkündürmü?
- Bəli. Kağız üzərində hər şey ola bilər. Mümkünsüz bir şey yoxdur. Bu səbəbdən arxayınlaşmaq olmaz. Komanda olaraq bunu dərk edirik. Heç kim deyə bilməz ki, 100 faiz Premyer Liqadayıq. Bu səbəbdən maksimum nəticələr qazanmağa çalışırıq.
- Növbəti turda "Zirə" ilə üz-üzə gələcəksiniz. Bu oyunda məqsəd nə olacaq?
- "Zirə" ölkənin ən yaxşı komandalarında biridir. Çətin rəqibdir. Oyunun ciddəyətinin fərqindəyik. Bizim azarkeşlərimiz daha çox olacaq. Xal və xallar üçün əlimizdən gələni edəcəyik.
- "Kəpəz" bu mövsüm çempionatda qalmaq üçün mübarizə apardı. Növbəti mövsüm hədəf nə olmalıdır?
- Bu mövsüm büdcə baxımından elə də zəngin deyildik. Ona görə çempionatda qalmaq üçün mübarizə apardıq. İnanıram ki, gələn mövsümdən daha yaxşı olacağıq. Buna ümid edirik. Büdcə normal olsa, daha yaxşı yerlər uğrunda mübarizə apara bilərik.
- Mövsümün sonunda müqavilən başa çatır. Yeni təklif olubmu?
- Xeyr. Hələlik bir şey yoxdur. Mən gəncəliyəm, bura doğma komandamdır. Təklif olsa, oturub danışacağıq. İnşallah, hər iki tərəf üçün xeyirli olar. Düşünürəm ki, mövsümün sonunda bu barədə danışıq olacaq.
