Idman.biz
Birinci Liqa təmsilçisi "Şəfa"nın baş məşqçisi Elgiz Kərəmli komandasının hazırkı durumu və ayrılıqlar barədə danışıb.
Mütəxəssis bildirib ki, meydana yalnız tam hazır vəziyyətdə olan futbolçular buraxılır.
"Meydançaya tam hazır vəziyyətdə olan futbolçuları çıxarırıq. Düzgün qərarlar qəbul etdiyimiz üçün hazırda birinci pillədəyik", - deyə futbolinfo.az-a açıqlamasında deyib.
E.Kərəmli bir neçə gün öncə komandadan ayrılaraq "Mingəçevir"ə transfer olunan Amil Yunanovla bağlı səsləndirilən fikirlərə də münasibət bildirib. O, futbolçunun baş məşqçinin ona şans verməməsi ilə bağlı açıqlamasına cavab olaraq qeyd edib: "Komandadan bir neçə nəfərlə yollar ayrılıb. Ədilxan Qaraəhmədov, Seymur Rəhimov, Elvin Nəsibov, Amir Ebrahimzadə və Amil Yunanov artıq bizimlə deyillər. Buna səbəb bizi qane etməmələri olub. Bu səbəbdən yolları ayırdıq. Başqa səbəb yoxdur".
Qeyd edək ki, "Şəfa" hazırda 30 xalla Birinci Liqanın turnir cədvəlinə başçılıq edir.
