Idman.biz
Özbəkistan millisinin hücumçusu Eldor Şomurodov karyerasını "İstanbul Başakşehir"də davam etdirməsi ilə bağlı danışıb.
İdman.biz xəbər verir ki, ötən həftə 30 yaşlı futbolçunun "Roma"dan Türkiyə klubuna keçidi rəsmiləşib.
Müqavilə satınalma hüququ ilə gələn mövsümün sonuna qədər nəzərdə tutulub.
Championat.uz saytına danışan Şomurodov yaş amilini də vurğulayıb: "İlk növbədə qeyd etməliyəm ki, artıq 30 yaşım var. İndi təkcə futbolla deyil, həm də karyeramın sonları və məsələnin maliyyə tərəfi ilə də maraqlanmalıyam.
BƏƏ və Qətərdən konkret təkliflər var idi. Mən yalnız qarşıdakı dünya çempionatı haqqında düşünürdüm. Fikrimcə, Türkiyə çempionatı orta səviyyəli liqadır. BƏƏ-dən güclü, amma İtaliyadan bir qədər zəifdir".
Özbəkistanlı futbolçu "Başakşehir"in avrokuboklarda iştirakının da onun üçün seçimdə önəmli olduğunu vurğulayıb: "Türkiyənin daha böyük klublarından da təkliflər var idi, amma mən "Başakşehir"i seçdim, çünki o öz infrastrukturu olan gənc bir klubdur. Burada digər komandalarla müqayisədə təzyiq azdır və daim oyun təcrübəsi qazanacağıma əminəm. İnşallah, zədəsiz bir mövsüm keçirərik və bu, dünya çempionatına yaxşı hazırlıq olar. Biz qarşılıqlı faydalı razılaşma əldə etdik".
İdman.biz
