Idman.biz
Sabah keçiriləcək "Qarabağ" - "Çelsi" oyunu təkcə ölkəmizin sıravi azarkeşlərinin və futbol mütəxəssislərinin deyil, həm də digər idman növlərində tanınmış idmançıların da böyük marağına səbəb olub.
Həyəcanla gözlədiyimiz qarşılaşma barədə İdman.Biz yunan-Roma güləşi üzrə dördqat dünya çempionu Eldəniz Əzizli ilə danışıb.
Maraqlıdır ki, Eldəniz Əzizlinin sabahkı oyunla bağlı proqnozu ümidverici deyil:
"Bəli, əlbəttə, hamımız bu oyunda klubumuz üçün müsbət nəticə arzulayırıq. Amma acı reallıqlar var. Reallıq isə ondadır ki, "Qarabağ" britaniyalı, özü də ən yüksək səviyyəli klubla qarşılaşacaq. Düşünmürəm ki, futbolçularımız onların hücumçularına çata və bütün oyunboyu yüksək tempdə oynaya bilsinlər. Buna görə də məğlubiyyət qaçılmazdır. Amma "Qarabağ"ın Çempionlar Liqasının qrup mərhələsinə ilk çıxışı zamanı olduğu kimi (2017-ci ildə səfərdə 0:6, Bakıda 0:4 hesabı ilə uduzmuşdu – red.) darmadağın olmayacaq. Fikrimcə, əgər ağdamlılar birinci hissədə bir qol buraxsalar, oyun 0:2 və ya 0:3 hesabı ilə bitəcək. Qol vuracağımıza isə inanmıram, çünki komandada seçilən hücumçu yoxdur", – deyə Eldəniz Əzizli bildirib.
Vüqar Vüqarlı
