Idman.biz
"Zirə" klubunun yarımmüdafiəçisi Eldar Quliyev millimizin DÇ-2026-nın seçmə mərhələsində Ukrayna ilə keçirəcəyi oyundan danışıb.
İdman.biz-in məlumatına görə, futbolçu qeyd edib ki, baş məşqçi dəyişikliyi çətin ki, vəziyyəti kökündən dəyişsin.
"Çətin ki. Ola bilsin ki, komanda müəyyən dərəcədə emosional yük ala bilər, başqa heç nə yox. Yeni məşqçi belə qısa müddətdə heç nəyi kökündən dəyişə bilməz", - dynamo.kiev futbolçunun sözlərindən sitat gətirir.
Quliyev Azərbaycan futbolu ilə bağlı təəssüratlarından da danışıb:
"Bura keçəndə düşünürdüm ki, çempionat zəif olacaq. Amma bu, səhv fikirdir. "Zirə" hədəfləri olan komandadır. Burada oynayanda anladım ki, Ukraynada indi yarışların səviyyəsi burdakından çox da yüksək deyil. Azərbaycanın baxımlı, yaxşı çempionatı var, onun lokomotivi "Qarabağ" Çempionlar Liqasının qrup mərhələsinə yüksəlib. Amma əminəm ki, bir neçə ildən sonra başqa klublar da avrokubokların qrupmərhələsinə yüksələ biləcəklər".
Milli komandanın liderləri ilə bağlı sualı cavablandıran yarımmüdafiəçi qeyd edib:
"Sol cinah müdafiəçisi Elvin Cəfərquliyevi bəyənirəm. Mahir Emreli də "Kayzerslautern"də yaxşı çıxış edir. Bununla belə, o, millidə klubda olduğu qədər yaxşı görünmür".
Azərbaycanın İslandiyaya uduzmasını (0:5) və Fernando Santuşun gedişini şərh edən Quliyev əlavə edib:
"Hesab edirəm ki, hamı razılaşacaq ki, bu, hesab baxımından biabırçılıqdır. Milli komanda hazırda uğursuz dövr yaşayır. Görürsünüz, Azərbaycanda da onun işləri alınmadı. Bunda təəccüblü heç nə yoxdur, hər şey buna doğru gəlirdi".
Ukrayna ilə qarşıdakı görüş barədə isə futbolçu bunları deyib:
"Ev matçlarında, hətta müdafiədə oynasa da, rəqibin kimliyindən asılı olmayaraq, Azərbaycanın hər zaman fürsətləri olur. Amma Ukrayna millisinin futbolçuları hər şeyi düzgün etsələr, qonaqların xüsusi problemi olmamalıdır. Meydan sahibləri özləri üçün müsbət nəticə qazansalar, bu, böyük sensasiya kimi görünəcək".
Azərbaycan - Ukrayna oyunu sentyabrın 9-da Bakıda keçiriləcək.
İdman.biz
