Sport24.az
"Kəpəz"in futbolçusu Ehtiram Şahverdiyev Sport24.az-a müsahibə verib. 27 yaşlı futbolçu "Sabah"la oyun barədə fikirlərini bölüşməklə yanaşı, bizi maraqlandıran başqa sualları da cavablandırıb.
- "Sabah"a qarşı yaxşı mübarizə aparsaz da sonda məğlub olduz. Ən azı 1 xal üçün nə çatmadı?
- Bildiyiniz kimi mövsümə yaxşı başlamamışıq. Xal qazana bilməməklə yanaşı, qol da vura bilməmişdik. "Sabah"la matça yaxşı başladıq, 2 qol vurub önə keçdik. Təəssüf ki, hesabı qoruya bilmədik. Rəqib fasilədən sonda bütün gücünü və səviyyəsini ortaya qoydu. "Sabah" geridönüş etməklə qələbə qazandı. Məğlubiyyətə baxmayaraq, vurduğumuz qollar qarşıdakı oyunlarda bizə daha yaxşı mübarizə aparmaq üçün motivasiya olacaq.
- Səncə, Adil Şükürovun gedişi komandada müsbət dəyişikliyə gətirib çıxaracaq?
- Öncə onu deyim ki, Adil müəllimin getməsi və ya qalması barədə fikir bildirməyim düz çıxmaz. Bu baş məşqçi ilə klub rəhbərliyi arasında olan məsələdi. Amma futbolçu kimi onu deyim ki, hazırkı heyəti Adil müəllim yığıb və bizim inkişafımızda da onun müstəsna xidmətləri olub. Adil Şükürov savadlı, bacarıqlı məşqçidi, ona uzun ömür, can sağlığı və gələcək karyerasında uğurlar arzu edirəm.
- Komandanızda yeni oyunçular var. Onların kollektivə tam uyğunlaşmadığı hiss olunur. Amma son görüşdə yenilər özlərini yaxşı tərəfdən göstərdilər və qol da vurdular...
- Ötən mövsümkü heyət ilə indiki arasında çox fərq var. Komanda 70 faiz dəyişib. Yeni gələnlərin kollektivə uyğunlaşması üçün vaxt lazımdı. "Sabah"la qarşılaşmada bütün komanda yaxşı çıxış etdi. Ndiaye ilə Braqa qol vurdu. Düşünürəm ki, yenilər qarşıdakı turlarda özlərini daha yaxşı tərəfədən göstərəcəklər.
- Çoxları "Kəpəz"in mövsümün sonunda elitanı tərk edəcəyini söyləyir...
- Bizim qarşımıza bəlli hədəf qoyulub. Bütün qüvvəmizi, bacarığımızı ortaya qoyacağıq ki, autsayder olmayaq və elitada qalaq. Çalışacağıq ki, oyunumuzla özümüz haqqında autsayder yox, mübariz, döyüşkən komanda kimi söz etdirək.
ABDULLA İSMAYILOĞLU
