Sport24.az
"Türkiyə ilə Gürcüstana azarkeşlik etsəm də, favoritim İngiltərədi. "Dumanlı Albion" təmsilçisi pley-offda qalib gəlsə də, oyun planında heç də yaxşı təsir bağışlamadı. Buna baxmayaraq, ingilislərin heyətində səviyyəli oyunçular var. Toparlanıb daha yaxşı çıxış edəcəklərini gözləmək olar". Bu sözləri Sport24.az-a açıqlamasında Əfran İsmayılov deyib.
Veteran futbolçu Gürcüstan yığmasının qitə çempionatında çıxşını dəyərləndirməklə yanaşı, bu gün baş tutacaq Türkiyə - Avstriya matçı ilə bağlı da fikirlərini bölüşüb: "Gürcüstan yığması tarix üzərinə tarix yazdı. Onlar heç kimin gözləmədiyi halda qitə çempionatına vəsiqə qazandı və çoxlarının ağlına gəlmədiyi halda qrupdan çıxmağı bacardı. Qonşumuz ispanlarla oyunda da pis oynamadı. Amma səviyyə fərqi sözünü dedi. İstənilən halda gürcürlər böyük uğur qazandılar. Bu gün futbolsevərlərimizin gözü Türkiyə - Avstriya qarşıdurmasında olacaq. Hər iki tərəf qələbə üçün əlindən gələni edəcək. Fikrimcə, şanslar 50-nin 50-yədi".
Qeyd edək ki, Avstriya – Türkiyə matçının start fiti Bakı vaxtı ilə 23:00-da səslənəcək.
ABDULLA İSMAYILOĞLU
