Donnarumma "Mançester Siti"yə keçməyə yaxınlaşır, danışıqlar müsbət gedir

Son günlər Canluici Donnarummanın "Mançester Siti"yə transferi ilə bağlı mühüm irəliləyişin olduğu bildirilir.

İdman.biz xəbər verir ki, bu barədə "Football Italia"dan Alfredo Pedulla məlumat verib.

Onun sözlərinə görə, "Siti" və PSJ arasında aparılan danışıqlar müsbət məcrada gedir və tərəflər razılığa yaxınlaşırlar.

Pedulla bildirir ki, Donnarumma üçün tələb olunan məbləğlə bağlı danışıqlarda nəzərəçarpacaq irəliləyiş var və bu məbləğ PSJ-nin əvvəlcə istədiyi yüksək qiymətdən aşağı düşəcək.

Fransa klubu əvvəl italiyalı qapıçı üçün 45-50 milyon avro aralığında tələb irəli sürmüşdü, lakin "Mançester Siti" bu qədər ödəmək niyyətində deyildi.

Hazırda PSJ Donnarummanı satmağa və onun yüksək maaş yükündən qurtulmağa çalışdığı üçün qiyməti xeyli aşağı salmağa hazırdır.

Donnarumma "Mançester Siti"də Edersonun gələcəyi ilə bağlı yaranan suallar fonunda "şəhərlilər"in əsas transfer hədəflərindən birinə çevrilib. Braziliyalı qapıçı klub üçün böyük xidmətlər göstərmiş olsa da, artıq Pep Qvardiolanın bir nömrəli seçimi olmadığı görünür. Pedulla əlavə edir ki, "Qalatasaray" Edersonu heyətinə qatmaqda maraqlıdır və bu transferlə bağlı danışıqlar davam edir.

Əgər transfer baş tutarsa, Donnarumma Edersondan əhəmiyyətli dərəcədə üstün bir seçim ola bilər. Bu arada, 22 yaşlı ingiltərəli qolkiper Ceyms Trafford da bu yay "Siti"yə qoşulub.

İdman.biz