Idman.biz
Dioqu Jotanın ailəsinin bu gün "Anfield" stadionunda "Liverpul"un yeni mövsüm Premyer Liqada "Bornmut"a qarşı ilk matçına təşrif buyuracağı gözlənilir.
İdman.biz xəbər verir ki, İngiltərə çempionu keçmiş hücumçusu olan Jotaya ehtiramını bildirməyi planlaşdırır.
28 yaşlı futbolçu ötən ay İspaniyanın şimalında qardaşı, 25 yaşlı Andre Silva ilə birlikdə avtomobil qəzasında həlak olub.
Premyer Liqanın bu həftəsonu keçiriləcək bütün oyunlarında bir dəqiqəlik sükut elan olunacaq, futbolçular qara sarğı taxacaq və stadion ekranlarında xatirə mesajları və şəkilləri göstəriləcək.
"Liverpul" klubundan bildiriblər ki, "Anfild"də azarkeşlər tərəfindən təşkil olunmuş xüsusi anım tədbiri də olacaq. Sükut zamanı Kop tribunasında və "Sir Kenny Dalglish" tribunasında xüsusi mozaika nümayiş etdiriləcək.
Oyun üçün nəşr olunan proqramda "Liverpul"un baş məşqçisi Arne Slot belə yazıb: "Bilirik ki, bu bizim üçün emosional bir gün olacaq, çünki bu, Dioqu və Andrenin itkisinə görə oynadığımız ilk liqa oyunudur.
Daha əvvəl də qeyd etdiyim kimi, futbol dünyası, xüsusilə də "Liverpul" ictimaiyyəti tərəfindən göstərilən ehtiram olduqca təsiredici idi. Bilirəm ki, bu axşam onların xatirəsi üçün bir daha bir araya gələcəyik.
Düşünürəm ki, Dioqunun həyat yoldaşı, uşaqları və ailəsi stadionda olacaq. Klub olaraq onlara sevgimizi və dəstəyimizi daim göstərəcəyimiz çox vacibdir. Bu çətin dönəmdə onların yanında olacağıq".
"Liverpul" futbolçuları bu oyun üçün öz formalarında və stadion geyimlərində "Forever 20" ("Əbədi 20") yazılı xüsusi nişanla meydana çıxacaqlar. Bu nişan mövsüm boyu istifadə olunacaq.
Jota ötən mövsüm "Liverpul"un rekord 20-ci liqa çempionluğunu qazandığı zaman 20 nömrəli forma ilə çıxış edib. Klub Portuqaliya millisinin sabiq oyunçusunun həyat yoldaşı Rute Kardozo və ailə üzvləri ilə məsləhətləşdikdən sonra bu nömrəni rəsmən istifadədən çıxardığını elan edib.
Jotanın Premyer Liqadakı digər sabiq klubu "Vulverhempton" da şənbə günü "Mançester Siti" ilə keçirəcəyi mövsümün ilk ev oyununda futbolçuya həsr olunmuş xüsusi anım tədbiri planlaşdırır.
İdman.biz
