Idman.biz
Dioqo Jotanın fizioterapevti Migel Qonsalveş futbolçunun İspaniyanın Zamora əyalətində qardaşı ilə birlikdə ölümünə səbəb olan faciəvi avtoqəzadan əvvəl son saatları barədə danışıb.
İdman.biz xəbər verir ki, "Record" nəşrinin məlumatına əsasən, nəfəs alma fizioterapevti portuqaliyalı hücumçunu ölümündən cəmi beş saat əvvəl müalicə edib.
Jota pnevmotoraks və ya çökmüş ağciyər kimi tanınan bir vəziyyətdən əziyyət çəkirdi. Bu problem onu bir müddət narahat etsə də, əməliyyatı təxirə salmışdı. Təyyarə ilə uçuşun sağlamlığı üçün təhlükəli olduğunu bildikdən sonra gəmiyə minib İngiltərəyə qayıtmaq qərarına gəlmişdi.
Qonsalveş futbolçu qardaşları axşam saat 20:30 radələrində gördüyünü və havanın yüksək temperaturundan qaçmaq üçün gecə saatlarında yola çıxmağı planlaşdırdıqlarını bildirib.
Fizioterapevt həmçinin onların əylənməyə getmələri ilə bağlı yayılan şayiələri təkzib edib və xəstəsini "peşəkar" kimi təsvir edib: "O, mənə səyahətin təxminən səkkiz saat çəkəcəyini, lakin istirahət etmək üçün Burqos bölgəsindəki hoteldə qalacaqlarını söylədi. Dioqo öz peşəkarlığını yaxşı bilirdi. Onlar əvvəlcə Santanderə çatmalı, sonra da gəmiyə minib İngiltərəyə getməli idilər.
Ailəsi daha sonra təyyarə ilə gəlməli idi və bazar ertəsi günü Liverpulda həkim qəbuluna getməliydi ki, vəziyyəti dəyərləndirilsin. Mən onunla keçən şənbədən işləməyə başlamışdım və bu çərşənbə gününə qədər hər gün onun yanında olmuşam. Onlarla axşam yeməyində vidalaşdım".
Qonsalveş xəstəliyin vəziyyətinə də aydınlıq gətirib: "Sağ ağciyərinin alt hissəsi bir qədər çökmüşdü, lakin fizioterapiya sayəsində, demək olar ki, mükəmməl vəziyyətdə idi. Dünən ondan ayrıldığım zaman artıq ağrıları yox idi və Liverpula qayıtmağa hazırlaşırdı".
Fizioterapevtin sözlərinə görə, portuqaliyalı futbolçu "Liverpul"un Yaponiyadakı yay hazırlıq toplanışına qatılmaq fikrində deyildi, çünki diqqətini tam şəkildə bərpasına yönəltmək istəyirdi.
İdman.biz
