Idman.biz
"Bizim üçün çox çətin oyun olacaq, bunu bilirik. Çünki biz daha çox investisiya qoyulan və UEFA Çempionlar Liqasında çıxış edən güclü bir komandaya qarşı oynayacağıq".
Bunu "Şamaxı"nın portuqaliyalı yarımmüdafiəçisi Dioqo Balau futbolinfo.az-a müsahibəsində deyib.
Həmin müsahibəni təqdim edirik:
– 8-ci turda öz meydanınızda "Kəpəz"ə 1:4 hesabı ilə uduzdunuz. Böyükhesablı məğlubiyyət sizin üçün gözlənilməz olmadı? Sonuncu pillədə qərarlaşan "Kəpəz"ə məğlubiyyətin səbəbini nədə görürsünüz?
– Bu, ağır məğlubiyyət idi. Əlbəttə ki, bu cür nəticəni gözləmirdik. "Kəpəz"lə oyuna qədər son matçlarda yaxşı təsir bağışlamışdıq. Düşünürəm ki, bu görüşə düzgün yanaşmadıq və bu, bizə 3 xal itkisi ilə başa gəldi.
– Komanda yoldaşınız Abdullahi Şuaybu qırmızı vərəqə almasaydı, fərqli hesab qeydə alına bilərdimi?
– Bəli, buna heç bir şübhəm yoxdur. Əminəm ki, Şuaybu qırmızı vərəqə almasaydı, biz daha çox qol vura və oyunu qazana bilərdik.
– Növbəti turda sizi ağır sınaq gözləyir. "Qarabağ"la səfər matçında hansı nəticəyə ümid edirsiniz?
– Bizim üçün çox çətin oyun olacaq, bunu bilirik. Çünki biz daha çox investisiya qoyulan və UEFA Çempionlar Liqasında çıxış edən güclü bir komandaya qarşı oynayacağıq. Buna baxmayaraq, motivasiyalı və diqqətliyik, düzgün düşüncə tərzinə sahibik. Meydanda 11 nəfər 11 nəfərə qarşı oynayır – nə baş verəcəyini görəcəyik.
– "Şamaxı" hazırda turnir cədvəlində 7-ci pillədə qərarlaşıb. Komandanın gücü, hazırkı heyət daha yuxarı pillədə qərarlaşmağa imkan verir?
– Bəli, imkan verir, biz hazırıq! Təbii ki, daha yaxşı oynaya bilərik və iki vacib futbolçumuz zədədən qayıtdıqda daha da güclənəcəyik.
– Qısa zamanda "Şamaxı" azarkeşlərinin ən çox ümid bəslədiyi oyunçulardan birinə çevrilməyi bacarmısınız. Öz performansınızdan tam razısınız?
– Buna görə şadam, amma hələ görüləsi çox iş var. Daha çox qol vurmaq, daha çox assist vermək, komandaya qələbələr qazanmaqda kömək etmək istəyirəm. Bütün bunlar daha tez-tez yaşandıqca, bəlkə, onda özümdən razı qala bilərəm.
– Braziliya və Portuqaliyadan olan legionerlərin Azərbaycan çempionatına uyğunlaşması daha qısa çəkir və onların əksəriyyəti özünü burada yaxşı tərəfdən göstərməyi bacarır. Bunu nə ilə izah edərdiniz?
– Məncə, bu, oyunçuların fərdi keyfiyyəti ilə bağlıdır və eyni zamanda uğura olan aclığımızla əlaqədardır. Portuqaliyalı və braziliyalı futbolçular həyatdakı vəziyyətlərə tez uyğunlaşmağa meyllidirlər – bu, futbolda da belə olur. Keyfiyyət və zəhmətin birləşməsi həmişə öz nəticəsini verir. Təbii ki, bəzi oyunçulara daha çox vaxt lazımdır. Amma onlara həmin zamanı versəniz, azarkeşlər gec-tez oyunlarından zövq alacaqlar.
