İdman.biz
"İndi "Qarabağ" aslanlar kimi hücum edəcək. Buna görə onlara Azərbaycan aslanları deyirlər".
İdman.biz xəbər verir ki, bunu Zaqreb "Dinamo"sunun sabiq futbolçusu Branko Strupar deyib.
O, Çempionlar Liqasının sabah keçiriləcək "Qarabağ" – "Dinamo" matçından gözləntilərini açıqlayıb: "Amma hesab edirəm ki, ilk oyundakı 3:0 hesablı qələbə ciddi üstünlükdür. Bunun kifayət edəcəyini düşünürəm. Lakin mərhələ keçmək üçün ağıllı və intizamlı oynamaq lazımdır. Vacib olan "Qarabağ"ı keçməkdir. Əsas məqsəd də budur. "Qarabağ"ın yaxşı komanda olduğunu bilirik. İlk oyundakı nəticə heç də real durumu əks etdirmir. Onların ilk matçda necə oynadığını nəzərə almalıyıq".
Strupar "Dinamo"ya məsləhət də verib: "Ehtiyatlı oynamaq lazımdır. Rəqib məyus olanda qəzəblənə bilər. İlk görüş tam fərqli də ola bilərdi. Zaqrebdə qol vurmadıqları üçün çox üzgündürlər. Rəqib qələbəyə və sensasiyaya acdır. Amma "Dinamo" "Lüdoqorets" deyil, daha ciddi və güclü komandadır".
Qeyd edək ki, "Qarabağ"la "Dinamo" arasında cavab görüşü sabah keçiriləcək.
İdman.biz
