"Difai"nin baş məşqçisi Araz Bağırov komandanın I Liqadakı ilk hədəfini açıqlayıb

Azərbaycanın I Liqa təmsilçisi "Difai"nin 2025/2026 mövsümündə əsas hədəfi ilk "5-lik"də yer almaq olacaq.

Bu barədə "Report"a komandanın yeni təyin olunan baş məşqçisi Araz Bağırov bildirib.

43 yaşlı mütəxəssis klubun maliyyə durumunun aşağı olması səbəbindən nisbətən gənc futbolçulara üstünlük verəcəklərini söyləyib:

"Komandanı, demək olar ki, sıfırdan yığırıq. Məqsədimiz yanvara qədər çempionatda ilk "5-lik"də yer almaqdır. Maliyyə durumumuz o qədər də yüksək deyil ki, məsələn, "Şəfa" kimi istədiyimiz oyunçunu transfer edək. Buna baxmayaraq, yaxşı seleksiya aparıb gənc və dinamik futbolçular toplayaraq yanvara qədər ilk "beşliy"ə düşməyə çalışacağıq. Məşqçi kimi konkret hədəfim budur. Daha sonra istiqaməti müəyyənləşdirəcəyik. İlk pillələrdə gedən komandalarla xal fərqimiz az olsa, çempionluğa, ən azı ilk "3-lüy"ə oynaya bilərik".

Baş məşqçi heyətlə bağlı həyata keçiriləcək dəyişikliklərdən danışıb:

"Heyətdə həm yerli, həm də legioner futbolçular olacaq. AFFA-nın legioner limiti ilə bağlı qərarını gözləyirik. Çünki qərar futbolçu sayına təsir edə bilər. İstənilən halda, əcnəbi futbolçu cəlb edəcəyik. Çünki mən gəlməmişdən əvvəl də komandada legionerlər çıxış edib. Əsas məqsəd 2002 və daha yuxarı təvəllüdlü futbolçuları cəlb etməkdir. Maliyyəmiz daha təcrübəli futbolçular dəvət etməyə imkan vermir. Maksimum yaş həddi 23 olacaq".

Qeyd edək ki, "Difai" Azərbaycan I Liqasının 2024/2025 mövsümünü 26 xalla 10 komanda arasında 9-cu pillədə bitirib. Klub ötən gün Araz Bağırovla 3 illik müqavilə imzalayıb.