Idman.biz
İspaniyanın "Barselona" futbol klubunun idman direktoru Deku komandanın vəziyyəti, transfer planları və bir neçə əsas futbolçunun gələcəyi ilə bağlı geniş açıqlamalar verib.
İdman.Biz xəbər verir ki, portuqaliyalı funksioner Joau Kanselunun vəziyyəti, Rafinyanın inkişafı, Mark-Andre ter Ştegenin statusu və qış planları barədə danışıb.
Deku bildirib ki, Joau Kanselu növbəti oyuna tam hazır olmaya bilər, çünki uzun müddət oynamayıb və fiziki formasını bərpa etməyə ehtiyacı var. Onun sözlərinə görə, Kanselunun komandaya qoşulması müdafiə xəttinin səviyyəsini ciddi şəkildə yüksəldəcək yeganə mümkün variant idi və yanvarda heyəti gücləndirməyən transfer etmək mənasız olardı.
O qeyd edib ki, klub Kanselunu mövsümün əvvəlindən istəsə də, maliyyə fair-play qaydaları buna imkan verməyib. İndi isə onun qayıdışı müdafiəni əhəmiyyətli dərəcədə gücləndirəcək. Kanselunun gəlişindən sonra Erik Qarsiyanın cinah müdafiəçisi kimi oynamasına ehtiyac qalmayacaq.
Deku əlavə edib ki, klub Kanselunu daimi əsasda transfer etmək istəyirdi, lakin Səudiyyə Ərəbistanından gələn təkliflə rəqabət aparmaq mümkün olmayıb.
İdman direktoru Rafinyanın inkişafına da toxunub. Onun sözlərinə görə, braziliyalı futbolçu artıq liderə çevrilib və xüsusilə Hansi Flikin gəlişindən sonra daha çox fərdi məsuliyyət götürməyə başlayıb.
Ter Ştegen məsələsinə gəlincə, Deku "Jirona"nın marağının olduğunu təsdiqləsə də, əvvəlcə klubla danışmalı olduqlarını bildirib. O vurğulayıb ki, alman qapıçının klubla müqaviləsi var və o, yüksək səviyyəli qapıçıdır.
Joan Qarsiyanın transferinin sırf idman səbəbləri ilə edildiyini bildirən Deku, onun gənc olduğunu və klubun həm bu gün, həm də gələcək üçün etibarlı qapıçıya ehtiyac duyduğunu deyib. Ter Ştegenin zədələrinin də bu qərara təsir etdiyini əlavə edib və Joan Qarsiyanın sürətli adaptasiyasından razılığını ifadə edib.
Nəhayət, Deku Robert Levandovskinin komandada qalmasının onun şəxsi motivasiyasından asılı olacağını, klubun isə hələ onun gələcək planlarını bilmədiyini qeyd edib. O, Ronald Arauxonun formasını bərpa etməsini də qışın ən vacib "transferlərindən" biri hesab etdiklərini bildirib və onun ən yaxşı vəziyyətində komandanın açar oyunçusu olduğunu vurğulayıb.
