Idman.biz
"Azərbaycanın ikinci böyük şəhərinin futbolu ağır durumdadır".
Bu sözləri sport24.az-a açıqlamasında "Kəpəz"in sabiq qapıçısı Davud Kərimi deyib.
Veteran qolkiper "sarı-göylər"in hazırkı durumu haqqında fikirlərini bölüşüb:
"Fikrimcə, səbəb yeni mövsümdə heyətdə köklü dəyişikliklərin olmasıdır. Bu, hər il davam edir. İnşallah, "Kəpəz" dirçələcək və yenidən azarkeşlərini sevindirəcək. Adil Şükürov komandaya ilk dəfə baş məşqçi kimi gələndə klubun vəziyyəti yaxşı deyildi. Bu durumdan komandanı çıxara bilmişdi. Transferlər vaxtında olmadı, Adil müəllim heyəti toplaya bilmədi, eniş yarandı, özü istefa verib getdi. Bu mövsüm isə heyəti özü yığmışdı, güvəndiyi futbolçular yanında idi. Çox təəssüf ki, alınmadı. Adil Şükürov yaxşı məşqçidir. Hər bir məşqçinin başına bu iş gələ bilər. Əsas odur ki, bundan sonra "Kəpəz" toparlansın. İnanıram ki, Gəncə futbolu Premyer Liqada qalacaq. Çox istərdim yeni baş məşqçi yerli olsun. Komandanı bu vəziyyətdən çıxara biləcək mütəxəssislərimiz var. Azər Bağırov, Tərlan Əhmədov baş məşqçi kimi bunu sübut edib".
Qeyd edək ki, "Kəpəz" Misli Premyer Liqasının ilk 5 turunun bütün oyunlarında məğlub olub.
