Idman.biz
"Şamaxı"nın braziliyalı yeni transferi David Tomasın futbolinfo.az saytına müsahibəsi
– "Şamaxı"ya keçidiniz necə alındı? Təklif alarkən kiminlə məsləhətləşdiniz və sizi cəlb edən nə oldu?
– Bu təklifdən, Azərbaycandan mənə maraq olmasından xəbər tutduqda çox sevindim. Bu, ölkənin öz ənənəsi olan komandalarından birində, rəqabətli çempionatda oynamaq üçün fürsət idi. Mən də bu fürsəti dəyərləndirməyi lazım bildim.
– "Şamaxı" ilə müqavilə imzalayana qədər Azərbaycan futbolu haqda hansı məlumata sahib idiniz?
– Açığı, Azərbaycan futbolunu yaxından izləmirdim. Amma burada oynamış komanda yoldaşlarım var idi və onlar həmişə bu çempionat haqqında yüksək fikirdə olublar. Azərbaycan Premyer Liqasında çıxış etmək karyerasında irəliləmək istəyənlər üçün yaxşı imkandır və bu da mənim əsas məqsədimdir.
– Yeni komandanızda sizi necə qarşıladılar? Adaptasiya prosesi necə keçir?
– Bütün komanda yoldaşlarım və məşqçilər heyəti məni çox yaxşı qarşıladı. Bizim həm xoş, həm də tələbkar bir mühitimiz var. Bu da möhtəşəm mövsüm keçirməyimizə kömək edəcək.
– Yeni mövsümə hazırlıq prosesində "Qəbələ" ilə yoxlama oyununda 1:2 hesabı ilə uduzdunuz və "Şamaxı"nın yeganə qoluna siz imza atdınız. Matçla və vurduğunuz qolla bağlı təəssüratınız necədir? Müdafiəçi olduğunuzu nəzərə alsaq, karyeranızda çox qolunuz var?
– Mövsümöncəsi ilk yoxlama oyunumuz idi. Məncə, bu görüş gələcəyə ümid verdi, komanda olaraq inkişaf edirik. Vurduğum qola gəlincə, mənim üçün əsas prioritet rəqibin qapımızdan top keçirməsinə mane olmaqdır. Amma qol vurmaq da məni həmişə sevindirir. Buvaxtadək karyeram ərzində hər mövsümdə fərqlənə bilmişəm. Uğurlu seriyanı yeni sezonda da davam etdirəcəyimə ümidliyəm.
– "Şamaxı" ötən mövsüm liqada 10 komanda arasında 7-ci yeri tutmuşdu. 12 komandanın iştirakı ilə keçiriləcək yeni sezonda daha yaxşı nəticə göstərmək mümkün olacaq?
– Bunu bacaracağımıza inanıram. Əgər əzmlə çalışmağa, bütün fikrimizi futbolu yönəltməyə davam etsək, böyük nailiyyətlər əldə edə bilərik. İnkişaf etmək istəyən, gənc komandamız və bizə köməyini əsirgəməyən məşqçilər heyətimiz var. Buna görə də düşünürəm ki, doğru yoldayıq.
– Azərbaycan çempionatında keyfiyyətli hücumçular, xüsusən də legioner forvardlar az deyil. Bu məqam sizi qorxutmur ki? "Şamaxı"nın müdafiə xəttində "keçilməz sədd" ola biləcəksiniz?
– Liqada keyfiyyətli hücumçuların olması mənə əlavə motivasiya verir. Mənim böyük çempionatlarda oynamaq ambisiyam var, ona görə də ən yaxşılara qarşı oynamaqdan zövq alıram. Məndən böyük əzmkarlıq və məsuliyyət gözləyə bilərsiniz. "Şamaxı"ya kömək etmək üçün əlimdən gələn hər şeyi edəcəyəm.
İdman.biz
