Idman.biz
Madrid "Real"ının kapitanı və müdafiəçisi Dani Karvaxal İspaniya La Liqasının 10-cu turunda "Barselona" üzərində qazanılan 2:1 hesablı qələbədən sonra təəssüratlarını bölüşüb.
İdman.Biz xəbər verir ki, o, "Barselona"nı öz meydanlarında məğlub etməyin heyrətamiz olduğunu vurğulayıb:
"Bu, layiqli qələbə idi və hesab bizim üstünlüyümüzü tam əks etdirmir. Bu, birbaşa rəqibimizə qarşı həlledici oyun idi. Meydandan əla əhval-ruhiyyə və üç xalla ayrılırıq.
Top bizdə olmayanda da çox yaxşı oynadıq - nə vaxt pressinq etmək, nə vaxt müdafiə xəttini saxlamaq lazım olduğunu bilirdik. Rəqibə demək olar ki, heç bir real qol imkanı vermədik.
"Real"ın kapitanı kimi evdə "Barselona"nı məğlub etmək heyrətamiz hissdir. Amma biz realistik yanaşırıq - bu, sadəcə üç xaldır. Ümid edirəm ki, mövsümün sonunda bu qələbə həlledici olacaq, amma biz eyni şəkildə davam etməliyik".
Karvaxal qazanılan qələbədə azarkeşlərin də payının az olmadığını vurğulayıb: "Azarkeşlər möhtəşəm idilər. Bütün oyun boyu, xüsusən də çətin anlarda bizi dəstəkləyən hər kəsə təşəkkür edirəm. Komanda avtobusa mindiyi andan hər şey mükəmməl idi. Bu qələbə onların da qələbəsidir. Stadiondakı atmosfer inanılmaz idi".
Qeyd edək ki, "Real" bu qələbə ilə La Liqada liderliyini qoruyub saxlayıb.
