Idman.biz
İspaniyanın "Real Madrid" komandasının müdafiəçisi Dani Karvahal başqa kluba keçidi nəzərdən keçirmir.
İdman.Biz AS nəşrinə istinadla xəbər verir ki, ona sərfəli görünə biləcək təkliflər daxil olmasına baxmayaraq, Karvahal danışıqlara razılıq verməyib.
Müdafiəçinin bu yaxınlarda Qətərə səfəri "kral klubu"nun sabiq hücumçusu Xoseluya baş çəkmək və onun ailəsi ilə vaxt keçirmək məqsədi daşıyıb, digər klublarla danışıqlar aparmaq üçün yox.
Daha əvvəl bildirilirdi ki, müdafiəçi məşqlərə qayıdıb və artıq əsas komanda ilə məşqlərin bir hissəsində iştirak edib. 2025-ci ilin oktyabr ayının sonunda 33 yaşlı futbolçu sağ dizində oynaq zədəsi almışdı. Mənbənin məlumatına görə, Karvahal İspaniya Superkubokunda iştirak edə bilər. "Real" turnirin yarımfinalında Madrid "Atletiko"su ilə qarşılaşacaq.
Cari mövsümdə Karvahal bütün turnirlər üzrə səkkiz oyunda meydana çıxıb və məhsuldar hərəkətlərlə yadda qalmayıb. Futbolçunun klubla müqaviləsi 2026-cı ilin yayına qədər qüvvədədir. Transfermarkt portalının məlumatına görə, futbolçunun bazar dəyəri 7 milyon avrodur (14 milyon AZN).
